حزب اللہ کا سعودی میڈیا کی جھوٹی خبروں پر سخت ردعمل

سچ خبریں:حزب اللہ نے سعودی میڈیا کی جانب سے پھیلائی گئی ان جھوٹی خبروں کو سختی سے مسترد کر دیا جن میں دعویٰ کیا گیا تھا کہ حزب اللہ لبنان حکومت سے ٹکراؤ کی تیاری کر رہی ہے۔ تنظیم نے ان الزامات کو ملک میں بدامنی پھیلانے کی سازش قرار دیا۔

المیادین نیوز چینل کی رپورٹ کے مطابق حزب اللہ نے ان میڈیا رپورٹس کو سختی سے مسترد کر دیا ہے جن میں کہا گیا تھا کہ یہ تنظیم لبنان کی حکومت کے خلاف تصادم کی تیاری کر رہی ہے۔

یہ بھی پڑھیں: سعودی چینل کی افواہوں پر حزب اللہ کا ردعمل

رپورٹ کے مطابق، حزب اللہ نے ایک باضابطہ بیان جاری کرتے ہوئے سعودی نیوز چینلز العربیہ اور الحدث کی ان خبروں کو قطعی جھوٹ، بے بنیاد اور من گھڑت قرار دیا ہے جن میں دعویٰ کیا گیا تھا کہ حزب اللہ لبنان کی حکومت سے ٹکراؤ کی تیاری میں مصروف ہے۔

حزب اللہ نے ان رپورٹس کو لبنان میں بدامنی اور عدم استحکام پیدا کرنے کی ایک مشکوک سازش کا حصہ قرار دیا، بیان میں کہا گیا کہ یہ جھوٹی خبریں ان چینلز کی خیالی دنیا کی پیداوار ہیں اور ان کا مقصد صرف ملک میں افراتفری اور انتشار کو ہوا دینا ہے۔

مزید پڑھیں: سعودی میڈیا کا عراقی حالات میں آگ پر تیل کا کام

تنظیم نے تمام میڈیا اداروں سے اپیل کی ہے کہ ان جعلی خبروں کو نظرانداز کریں، اور تجزیہ و تبصرے کرتے وقت ان پر انحصار نہ کریں، حزب اللہ نے واضح کیا کہ اس کی پالیسی اور مؤقف کے بارے میں معلومات صرف تنظیم کے سرکاری ذرائع سے حاصل کی جائیں، خاص طور پر موجودہ حساس حالات میں۔