ڈھائی سال لڑنے کے باوجود حماس، حزب اللہ اور ایران کو شکست نہیں ہو سکی: سابق صہیونی وزیر اعظم

?️ 23 مئی 2026

سچ خبریں:سابق صہیونی وزیر اعظم ایہود باراک نے نیتن یاہو حکومت کو شدید تنقید کا نشانہ بناتے ہوئے کہا ہے کہ ڈھائی سال کی جنگ کے باوجود حماس، حزب اللہ اور ایران شکست نہیں کھا سکے۔

صہیونی حکومت کے سابق وزیر اعظم نے جنگی محاذوں کے حوالے سے نیتن یاہو کابینہ کی کارکردگی اور تل ابیب کے اہداف حاصل نہ ہونے پر شدید تنقید کی ہے۔

المیادین نیوز چینل کی رپورٹ کے مطابق صہیونی حکومت کے سابق وزیر اعظم ایہود باراک نے کہا کہ ڈھائی سال گزرنے کے باوجود حماس اب بھی غزہ میں موجود ہے، حزب اللہ لبنان میں برقرار ہے اور ایران کا حکومتی نظام بھی اپنی جگہ قائم ہے۔

انہوں نے مزید کہا کہ مکمل فتح اور ہم نے انہیں کئی نسلوں تک تباہ کر دیا ہے جیسے کھوکھلے نعرے نقصان دہ ثابت ہوئے ہیں۔

ایہود باراک اس سے قبل بھی بنیامین نیتن یاہو کو جال میں پھنسے ہوئے جانور سے تشبیہ دے چکے ہیں اور خبردار کیا تھا کہ نیتن یاہو عدالتی اور سیاسی بحرانوں سے نکلنے کے لیے کسی بھی حد تک جا سکتے ہیں۔

انہوں نے کہا کہ اگر نیتن یاہو کو انتخابات سے چند روز قبل اپنی شکست یقینی محسوس ہوئی تو وہ ایران، غزہ یا مغربی کنارے کے خلاف ایک نیا محاذ کھول سکتے ہیں تاکہ ہنگامی حالت نافذ کر کے انتخابات کو چھ ماہ کے لیے مؤخر کیا جا سکے۔