مسجد الاقصیٰ پر حملوں میں اضافہ، حماس کا یروشلم کو یہودیانے کے منصوبے کے خلاف انتباہ

?️ 18 ستمبر 2026

سچ خبریں:حماس نے مسجد الاقصیٰ پر صیہونی آبادکاروں کے مسلسل دھاوؤں اور فلسطینیوں پر پابندیوں کی مذمت کرتے ہوئے یروشلم کو یہودیانے کے منصوبوں کے خلاف مربوط اور مؤثر اقدامات کا مطالبہ کیا ہے۔

اسلامی تحریک مزاحمت حماس کے سیاسی دفتر کے رکن اور امور قدس کے سربراہ ہارون ناصرالدین نے مسجد الاقصیٰ کی بے حرمتی، صیہونی انتہاپسند وزیر اتمار بن گویر کی جانب سے مسجد میں یہودی مذہبی رسومات کی ادائیگی اور مقبوضہ بیت المقدس و اس کے باشندوں کے خلاف حملوں میں اضافے کی جانب اشارہ کرتے ہوئے، یہودیانے کے منصوبوں کو ناکام بنانے کے لیے تمام سطحوں پر مضبوط، مؤثر اور فیصلہ کن اقدامات کا مطالبہ کیا ہے۔

ناصرالدین نے آج جمعہ کو زور دیا کہ صہیونی آبادکاروں کی جانب سے مسجد الاقصیٰ پر مسلسل دھاوے ایک منظم منصوبے کا حصہ ہیں، جس کا ہدف مسجد الاقصیٰ اور مقبوضہ بیت المقدس کا قدیم شہر ہے۔ ان کا کہنا تھا کہ اس منصوبے کا مقصد شہر کی تاریخی شناخت اور عرب و اسلامی تشخص کو تبدیل کرنا ہے۔

انہوں نے کہا کہ مقبوضہ بیت المقدس میں مقیم فلسطینیوں کی ثابت قدمی، استقامت اور مزاحمت، نیز یہودیانے کے منصوبوں کے خلاف ان کی جدوجہد کے باعث یہ جرائم اپنے مقاصد حاصل نہیں کر سکیں گے۔

حماس رہنما نے فلسطینیوں کو مسجد الاقصیٰ سے دور رکھنے کے لیے قابض حکام کی عدالتوں کی جانب سے جاری کیے جانے والے احکامات میں اضافے پر بھی خبردار کیا۔ ان کے مطابق، رواں سال ایسے احکامات کی تعداد تقریباً 1000 تک پہنچ گئی ہے۔

ناصرالدین نے مزید کہا کہ ان عدالتی احکامات کے علاوہ، مقبوضہ بیت المقدس کے قدیم شہر اور مسجد الاقصیٰ میں فلسطینیوں کے داخلے کو روکنے کے ہزاروں واقعات بھی پیش آچکے ہیں۔ ان اقدامات کا مقصد مسجد الاقصیٰ کو فلسطینی نمازیوں اور وہاں موجود دیگر فلسطینیوں سے خالی کرانا ہے۔

انہوں نے ان اقدامات کو مقدس مقامات کے خلاف کھلی جارحیت قرار دیتے ہوئے، یروشلم اور مسجد الاقصیٰ کو یہودیانے کے لیے صیہونی منصوبوں اور سرگرمیوں کے خلاف سنجیدہ اقدامات پر زور دیا۔

ناصرالدین نے مسجد الاقصیٰ کو درپیش خطرات کا مقابلہ کرنے کے لیے فلسطینی، عرب اور اسلامی سطح پر مشترکہ مؤقف اپنانے کا مطالبہ بھی کیا۔

آخر میں انہوں نے مسجد الاقصیٰ اور شہر قدس کے خلاف یہودیانے کی پالیسیوں کا مقابلہ کرنے کے لیے عمومی اتحاد اور عوامی سطح پر وسیع شرکت کی ضرورت پر زور دیا۔ ان کا کہنا تھا کہ ان منصوبوں کو ناکام بنانے کے لیے تمام سطحوں پر مربوط اور مؤثر جدوجہد ناگزیر ہے۔