سعودی عرب کی پالیسی میں بڑا یوٹرن

سچ خبریں:سعودی عرب نے امریکہ اور اتحادیوں کو خبردار کر دیا کہ وہ یمن میں دوبارہ براہ راست نہیں لڑے گا۔

معروف امریکی اخبار وال اسٹریٹ جرنل نے انکشاف کیا ہے کہ سعودی عرب نے امریکہ اور اپنے یمنی اتحادیوں کو مطلع کر دیا ہے کہ وہ یمن میں انصار اللہ (حوثیوں) کے خلاف براہ راست زمینی جنگ میں شریک نہیں ہوگا، یہ فیصلہ ایسے وقت میں سامنے آیا ہے جب اماراتی حمایت یافتہ گروہ یمن میں ایک بڑی زمینی کارروائی کی تیاری کر رہے ہیں۔

یہ بھی پڑھیں:متحدہ عرب امارات اور سعودی عرب یمن کے پہلو میں خنجر ہیں: توکل کرمان

رپورٹ کے مطابق، سعودی عرب کو خدشہ ہے کہ یمنی مسلح افواج (انصار اللہ) ایک بار پھر میزائل اور ڈرون حملے شروع کر سکتی ہیں، اسی لیے ریاض نے براہ راست تصادم سے گریز کا فیصلہ کیا ہے تاکہ خود کو ممکنہ خطرات سے بچا سکے۔

یہ مؤقف سعودی خارجہ پالیسی میں ایک اہم اور معنی خیز تبدیلی کی نشاندہی کرتا ہے۔ ایک وقت تھا جب سعودی عرب یمن پر حملوں کا علمبردار تھا اور 2015 میں عاصفۃ الحزم کے نام سے فوجی اتحاد قائم کیا گیا تھا تاکہ انصار اللہ کو کمزور کیا جا سکے،اب، وہی ملک خود کو تصادم سے الگ رکھنے پر زور دے رہا ہے۔

دوسری جانب، وال اسٹریٹ جرنل نے رپورٹ دی ہے کہ اماراتی حمایت یافتہ یمنی گروہوں نے مغربی یمن، خصوصاً الحدیدہ بندرگاہ پر قبضہ کرنے کے لیے زمینی حملے کی تیاری کر لی ہے۔ ان کا ہدف یہ ہے کہ انصار اللہ کی معاشی سپلائی لائن کو منقطع کیا جا سکے۔

مزید پڑھیں:سعودی عرب یمن جنگ کے خاتمے کے لیے عملی اقدامات کرے:یمنی تجزیہ نگار

یہ کارروائیاں، امریکہ کی جانب سے یمن پر حالیہ فضائی حملوں کے پس منظر میں ہو رہی ہیں، جو خطے میں تناؤ کو مزید بڑھا رہی ہیں۔