صیہونیوں کے ہاتھوں غزہ میں 41 فیصد گردوں کے مریض شہید 

سچ خبریں:غزہ کی وزارت صحت کے مطابق، اسرائیلی حملوں اور طبی سہولیات کی تباہی کے باعث 41 فیصد گردوں کے مریض شہید ہو چکے ہیں،شمالی غزہ میں واحد ڈائیلاسز مرکز نوره الکعبی مکمل طور پر تباہ کر دیا گیا۔

غزہ کی وزارت صحت نے انکشاف کیا ہے کہ جنگ کے دوران 41 فیصد گردوں کے مریض مناسب طبی سہولیات نہ ملنے کے باعث شہید ہو چکے ہیں۔

یہ بھی پڑھیں:غزہ کی پٹی کے شمال میں 1000 سے زائد طبی عملے شہید

یہ اعداد و شمار فلسطینی خبر رساں ایجنسی شهاب کی رپورٹ میں سامنے آئے، جس کے مطابق صہیونی افواج کی جانب سے طبی مراکز پر منظم حملے اور ان کی تباہی کے باعث مریضوں کی زندگیاں شدید خطرے میں پڑ گئی ہیں۔

غزہ کی وزارت صحت نے بتایا کہ صہیونی افواج نے شمالی غزہ کے واحد فعال ڈائیلاسز مرکز نوره الکعبی کو مکمل طور پر تباہ کر دیا ہے۔ یہ اسپتال غزہ کے شمالی علاقوں جیسے بیت لاهیا، جبالیا، بیت حانون اور ام النصر کے درجنوں مریضوں کو روزانہ خدمات فراہم کرتا تھا۔

تباہی سے قبل یہ مرکز 160 سے زائد مریضوں کا علاج کر رہا تھا، تاہم اسرائیلی بمباری نے اسے زمین بوس کر دیا۔ پہلے کی گئی حملوں میں بیشتر ڈائیلاسز مشینیں پہلے ہی ناکارہ ہو چکی تھیں اور صرف 8 مشینیں باقی بچی تھیں، جو اب مکمل طور پر ختم ہو گئی ہیں۔

یہ حملہ اسرائیل کے وسیع حملوں کے سلسلے کا حصہ ہے جس میں متعدد اسپتالوں، طبی مراکز، ایمبولینس سروسز اور ڈاکٹروں کو نشانہ بنایا گیا ہے۔ اس کے باعث عام فلسطینیوں کی طبی خدمات تک رسائی نہایت محدود ہو گئی ہے۔

وزارت صحت نے عالمی برادری سے مطالبہ کیا ہے کہ وہ غزہ میں صحت کے نظام کے مکمل انہدام کو روکنے کے لیے اپنی انسانی ذمہ داریاں پوری کرے۔

غزہ کی وزارت صحت کے ڈائریکٹر جنرل منیر البرش نے نوره الکعبی اسپتال کی تباہی کے بعد کی تصاویر جاری کرتے ہوئے کہا کہ یہ مرکز حالیہ مرمت اور تجدید کے بعد ایک بار پھر فعال ہوا تھا، لیکن اب مکمل طور پر ختم کر دیا گیا ہے۔

مزید پڑھیں:حماس کا غزہ کے اسپتالوں میں بین الاقوامی مبصرین بھیجنے پر اصرار 

اقوام متحدہ اور مختلف امدادی ادارے پہلے ہی خبردار کر چکے ہیں کہ غزہ میں جاری محاصرہ، طبی سازوسامان کی عدم فراہمی اور اسپتالوں کی تباہی ایک انسانی المیے کی شکل اختیار کر چکی ہے، جس کی کوئی نظیر نہیں ملتی۔