21 ملین سے زائد زائرین کی کربلا میں موجودگی

?️ 18 ستمبر 2022

سچ خبریں:روضہ حضرت عباس کی انتظامیہ نے کربلا میں داخل ہونے والے راستوں پر نصب الیکٹرانک گنتی کے نظام کی بنیاد پر اس سال کے اربعین زائرین کی صحیح تعداد کا اعلان کیا۔

السومریہ نیوز ایجنسی کی رپورٹ کے مطابق حضرت عباس کے روضہ کی انتظامیہ کے بیان کے مطابق اس سال اربعین زائرین کی تعداد 21 ملین سے زائد ہوگئی، رپورٹ کے مطابق آستان قدس عباسی کی انتظامیہ نے ایک بیان میں اعلان کیا ہے کہ کربلا شہر میں داخل ہونے والے راستوں پر نصب الیکٹرانک گنتی کے نظام کے مطابق اس سال زائرین کی تعداد 21 ملین 198 ہزار 640 تھی۔

آستان قدس عباسی کے بیان میں اس سال کربلا میں اربعین زائرین کی تعداد کا گزشتہ سالوں سے موازنہ کرنے کے لیے ایک جدول بھی موجود ہے جس سے معلوم ہوتا ہے کہ اس سال زائرین کی تعداد میں گزشتہ سال کے مقابلے میں 50 لاکھ کا اضافہ ہوا ہے، قبل ازیں عتبہ عباسی نے اربعین کی تقریب میں شرکت کرنے والوں کی خدمت کرنے والے موکبوں کی تعداد 14500 بتائی تھی جن میں سے 300 موکب بیرونی ممالک کے تھے۔

اس حوالے سے "الاعلام الامنی” میڈیا گروپ (عراقی وزارت دفاع سے وابستہ) کے سربراہ بریگیڈیئر جنرل "سعد معن” نے کہا کہ اس سال زائرین کی تعداد 2003 کے بعد سب سے زیادہ تھی، عراقی فوج کے مشترکہ آپریشن ہیڈکوارٹر کے ترجمان تحسین الخفاجی نے تاکید کی کہ سکیورٹی فورسز اربعین زیارت کے منصوبے پر عمل درآمد جاری رکھے ہوئے ہیں۔