یوکرین کا دنیا کے نقشے سے غائب ہونے کا امکان

?️ 22 جولائی 2022

سچ خبریں:روسی سلامتی کونسل کے نائب سربراہ نے اس بات پر زور دیا کہ نیٹو منطق اور عقل کے برعکس روس کی سرحدوں کے قریب پہنچ رہا ہے اور یہ صورتحال یوکرین کو دنیا کے نقشے سے مٹانے کا باعث بن سکتی ہے۔
اسپوٹنک نیوز ایجنسی کی رپورٹ کے مطابق روسی سلامتی کونسل کے ڈپٹی چیئرمین نے کہا کہ جو بھی واقعات رونما ہو رہے ہیں ان کے نتیجے میں یوکرین کے دنیا کے نقشے سے ایک ملک کے طور پر مٹ جانے کا امکان ہے،اس مسئلے کا ذکر کرتے ہوئے دمتری میدویدیف نے اپنے ذاتی ٹویٹر پیج پر لکھا کہ روس یوکرینی حکام کی غلطیوں کا ذمہ دار نہیں ہے۔

انہوں نے کہا کہ 2014 کی بغاوت کے بعد یوکرین اپنی آزادی کھو بیٹھا ہے اور وہ براہ راست مغرب کے کنٹرول میں ہے نیز کیف کے حکام کا خیال ہے کہ نیٹو ان کی سلامتی کی ضمانت دیتا ہے، میدویدیف نے مزید کہا کہ موجودہ صورتحال کے نتیجے میں یوکرین باقی بچی ہوئی ریاستی خودمختاری بھی کھو سکتا ہے اور دنیا کے نقشے سے غائب ہو سکتا ہے۔

سینئر روسی عہدہ دار نے کہا کہ نیٹو، منطق اور عقل کے برعکس، روس کی سرحدوں تک اپنی پیش قدمی جاری رکھے ہوئے ہے، جس سے عالمی تنازعات اور انسانیت کے ایک بڑے حصے کی موت کا حقیقی خطرہ ہے۔