یمنیوں کو حق ہے وہ امریکہ کو اپنا قاتل سمجھیں:امریکی سنیٹر

?️ 29 جنوری 2021

سچ خبریں:ڈیموکریٹک پارٹی سے تعلق رکھنے والے ایک سینیٹر نے یمن میں اپنے ملک کے اقدامات پر تنقید کرتے ہوئے کہا ہے یمن میں امریکہ کے اقدامات سے اس عرب ملک میں داعش کو تقویت ملی ہے۔
الجزیرہ نیوز چینل کی رپورٹ کے مطابق امریکی ڈیموکریٹ سنیٹر کرس مرفی کا کہنا ہے کہ یمن میں امریکی مداخلت نےاس ملک میں داعش کو مضبوط کیا ہے۔ الجزیرہ نے جمعرات کی شب سینیٹر کے حوالے سے بتایا کہ انہوں نے یمن میں امریکی حکومت کے اقدامات پر تنقید کی ہے،مرفی نے کہا کہ یمنی باشندوں کو حق ہے کہ وہ اپنے ملک میں ہونے والی ہلاکتوں کے لئے واشنگٹن کو ذمہ دار ٹھہرائیں کیونکہ یہ بم امریکہ میں بنائے گئے ہیں جن سے یمنی عوام کاقتل عام کیا جارہا ہے۔

ڈیموکریٹک سینیٹر نے کہا کہ امریکہ نے یمنیوں کو مارنے کے لئے اسلحہ بھیجا جس کی بنا پر امریکہ اس ملک میں ہونے والی انسانی حقوق کی پامالی میں ملوث ہوگیا، مرفی نے کہا ،امریکہ نے یمن کے خلاف جاری جنگ میں شامل ہوکر اس ملک میں داعش کے لئےموقع فراہم کیا ہے، انہوں نے یمن کی عوام تحریک انصار اللہ کو دہشت گرد قرار دینے کے سلسلہ میں امریکہ پر تنقید کرتے ہوئے کہا کہ حوثی گروپ کو دہشت گردی کی فہرست میں شامل کرنا 80 فیصد سے زیادہ امداد یمن تک پہنچنے سے روکے گا۔

یاد رہے کہ سابق امریکی صدر ٹرمپ نے اپنی انتظامیہ کے آخری دنوں میں یمنی عوامی تنظیم انصاراللہ کو دہشت گرد قرار دیا تھا جس کے خلاف عالمی سطح پر وسیع پیمانے پر ردعمل سامنے آیا ، تاہم بائیڈن انتظامیہ نے حال ہی میں اعلان کیا ہےکہ وہ اس فیصلے کو ترک کر سکتی ہے جس کے بعد انھوں نے فروری کے آخر تک اس تنظیم کے ساتھ لین دین کرنے کی اجازت دی ہے تا کہ اس کے بعد کوئی مستقل فیصلہ کیا جاسکے۔