کربلا میں لاکھوں زائرین امام حسین کا اجتماع

🗓️ 27 ستمبر 2021

سچ خبریں:عراقی ذرائع نے کربلا میں اربعین تقریب میں امام حسین کے عقیدت مندوں کی ایک بڑی تعداد کے اکٹھے ہونے کی اطلاع دی۔
عراقی خبر رساں ایجنسی واع کی رپورٹ کے مطابق اس ملک کے مقدس شہر کربلا میں صحت کے اصولوں کی رعایت کرتے ہوئے لاکھوں زائرین موجود ہیں جبکہ مختلف عراقی صوبوں سے زائرین کی ایک بڑی تعداد اب بھی امام حسین کا چہلم منانے کے لیے مقدس شہر کربلا کی جانب پیدل آرہی ہے ۔

آستان قدس حسینی کے نائب متولی افضل الشامی نے اعلان کیا کہ اربعین کی تقریب میں شرکت کرنے کے لاکھوں افراد کربلا میں پہنچ چکے ہیں، انھوں نے اس بات کا ذکر کرتے ہوئےکہ مزید زائرین اور جلوس کربلا شہر میں پہنچ رہے ہیں، کہاکہ سروس اور سکیورٹی کی صورتحال قابل اطمئنان ہے نیز زائرین کو فراہم کی جانے والی خدمات میں کوئی کمی نہیں ہے، اس کے علاوہ شہر کے اطراف کے تمام محوروں میں بھی سکیورٹی کی صورتحال مستحکم ہے۔

الشامی نے مزید کہا کہ زائرین خدمت کے لیے بنائے گئے سکیورٹی اور سروس پلانز ضرورت کے مطابق تبدیل ہوتےرہتے ہیں،بڑی تعداد میں زائرین کے لیے تمام سہولیات اور خدمات کی دستیابی پر زور دیتے ہوئے ، انہوں نے اعلان کیا کہ آستان قدس حسینی کے تمام حصوں میں موجود وسائل مزید زائرین کو خدمات فراہم کر سکتی ہیں۔

آستان قدس حسینی کے نائب متولی نے کہا کہ کربلا کی سڑکیں گاڑیوں کے لیے کھلی ہیں تاکہ زائرین کو شہر کے مرکز سے قریب علاقوں میں پہنچایا جا سکےجبکہ کاروں اور زائرین کی نقل و حرکت کا منصوبہ بنایا گیا ہے اور منظم کیا گیا ہے نیز زائرین کو روضے کے قریب ترین مقام پر منتقل کرنے کے لیے آستان مقدس کی نقل و حمل کے ذرائع بھی دستیاب ہیں۔