پیرس میں چار ملکی اجلاس، لبنان میں کشیدگی بڑھنے پر تشویش

?️ 18 دسمبر 2025

پیرس میں چار ملکی اجلاس، لبنان میں کشیدگی بڑھنے پر تشویش

 جنوبی لبنان میں اسرائیلی حملوں اور جنگ بندی کی مسلسل خلاف ورزیوں کے دوران فرانس کے دارالحکومت پیرس میں فرانس، سعودی عرب، امریکہ اور لبنان پر مشتمل ایک چار ملکی سفارتی اجلاس منعقد ہو رہا ہے۔ یہ اجلاس ایسے وقت میں ہو رہا ہے جب خطے میں کشیدگی میں اضافے اور تل ابیب کو واشنگٹن کی مبینہ حمایت پر گہری تشویش پائی جا رہی ہے۔

لبنانی اخبار الاخبار کے مطابق، اس اجلاس کا مقصد لبنان کی فوج کی حمایت کے لیے مجوزہ بین الاقوامی کانفرنس کی تیاری ہے، جو ممکنہ طور پر آئندہ سال جنوری میں منعقد ہوگی۔ اجلاس میں لبنانی فوج کے کمانڈر جنرل رودولف ہیکل بھی شریک ہیں، جو وزارتِ دفاع فرانس اور الیزے پیلس میں ہونے والی ملاقاتوں میں جنوبی لبنان میں سیکیورٹی چیلنجز، اسرائیلی حملوں اور قابض افواج کی جانب سے پانچ اسٹریٹجک مقامات سے انخلا سے انکار پر تفصیلی بریفنگ دیں گے۔

ذرائع کے مطابق، اجلاس میں لبنانی فوج کی سیکیورٹی ذمہ داریوں میں مدد، جنوبی لبنان میں تعیناتی کے منصوبے پر عملدرآمد، سرحدی حد بندی کے نقشوں اور خطے میں استحکام کے لیے لبنان کے کردار پر گفتگو ہوگی۔ اس کے ساتھ ساتھ حزب اللہ کو غیر مسلح کرنے کے لیے لبنانی حکومت پر دباؤ کے معاملات بھی زیر بحث آئیں گے۔

امریکی صدر کے خصوصی ایلچی برائے لبنان مورگن اورٹیگاس اور فرانسیسی صدر کے نمائندے ژاں ایو لودریان اجلاس میں شریک ہیں اور وہ بات چیت کو آگے بڑھانے کے لیے بیروت کا دورہ بھی کریں گے۔

دوسری جانب، زمینی صورتحال بدستور کشیدہ ہے۔ جنوبی لبنان میں اسرائیلی فضائی حملے جاری ہیں۔ حالیہ دنوں میں ہرمل، زعرین، جبل الریحان اور لیتانی دریا کے اطراف متعدد فضائی حملے کیے گئے، جبکہ ایک اسرائیلی ڈرون حملے میں چار افراد زخمی ہوئے۔ لبنانی پارلیمنٹ کے اسپیکر نبیہ بری نے ان حملوں کو پیرس کانفرنس کے لیے اسرائیل کی جانب سے پیغام قرار دیا ہے۔

ادھر اسرائیلی وزیر خارجہ گیدعون ساعر نے دعویٰ کیا ہے کہ لبنان کے ساتھ اختلافات سادہ اور قابل حل ہیں اور اسرائیل لبنان کے ساتھ تعلقات کو معمول پر لانے کا خواہاں ہے، تاہم زمینی حقائق ان بیانات کے برعکس کشیدگی میں اضافے کی نشاندہی کر رہے ہیں۔