غزہ میں سردی سے بچوں کی اموات کھلا جرم ہے: حماس

?️ 18 دسمبر 2025

غزہ میں سردی سے بچوں کی اموات کھلا جرم ہے: حماس

حماس کے ترجمان نے شدید سردی کے باعث غزہ کی پٹی میں بچوں کی جانوں کے ضیاع پر گہری تشویش کا اظہار کرتے ہوئے اسے ایک کھلا اور واضح جرم قرار دیا ہے۔ ان کا کہنا ہے کہ بے گھر افراد، خصوصاً بچوں کا خیموں میں رہنا، مناسب رہائش اور گرمائش کے وسائل کی عدم دستیابی ان انسانی سانحات کی بنیادی وجہ ہے۔

خبر رساں ادارے شہاب کے مطابق، حماس کے ترجمان حازم قاسم نے جمعرات کو کہا کہ شدید سردی کے باعث غزہ میں بچوں کی اموات کا سلسلہ جاری ہے، جن میں تازہ واقعہ خان یونس شہر میں پیش آیا۔ انہوں نے کہا کہ یہ صورتحال صہیونی قابض رژیم کے محاصرے کے تسلسل، جنگِ نسل کشی کے بعد تعمیر نو میں رکاوٹوں اور مناسب پناہ گاہوں کی فراہمی کو روکنے کا براہِ راست نتیجہ ہے۔

حازم قاسم نے زور دیا کہ بے گھر خاندانوں، بالخصوص بچوں کا خستہ حال خیموں میں رہنا اور گرم کپڑوں و حرارتی آلات کی کمی ان المیوں کا سبب بن رہی ہے۔ انہوں نے کہا کہ عارضی گھروں کی فراہمی اور تعمیر نو کے آغاز کے لیے بارہا اپیلوں کے باوجود عالمی برادری نے غزہ کے بچوں کو بچانے کے لیے کوئی سنجیدہ قدم نہیں اٹھایا۔

انہوں نے مزید کہا کہ غزہ کے بچے پہلے بمباری اور آگ میں جان دیتے تھے اور اب سردی کا شکار ہو رہے ہیں، جس سے بحران کی سنگینی مزید بڑھ گئی ہے۔ حماس کے ترجمان نے اجتماعی اموات کو روکنے کے لیے عالمی برادری سے فوری اور عملی اقدامات کا مطالبہ کیا۔

قاسم نے امریکی حکومت اور صدر سے بھی مطالبہ کیا کہ وہ قابض رژیم پر دباؤ ڈالیں تاکہ جنگ بندی معاہدے کی پابندی کی جائے، انسانی امداد کی ترسیل ممکن بنائی جائے، حقیقی اسکان کا انتظام ہو اور سرحدی گزرگاہیں کھولی جائیں۔

اس سے قبل ناصر میڈیکل کمپلیکس کے شعبہ اطفال کے سربراہ ڈاکٹر احمد الفرا نے خبردار کیا تھا کہ شدید سردی کے باعث غزہ میں بچوں کی اموات کا خطرہ بدستور موجود ہے۔ انہوں نے کہا کہ کنٹینرز، تیار شدہ گھروں اور گرمائش کے وسائل کی محدود دستیابی کے سبب بچوں، خصوصاً نومولود اور نارس بچوں کی جانوں کو شدید خطرہ لاحق ہے۔

ان کے مطابق، ساحلی علاقوں کے قریب خستہ حال خیموں میں رہائش پذیر خاندانوں کے کئی نارس بچے جان کی بازی ہار چکے ہیں۔ انہوں نے زور دیا کہ یہ حالات نہ صرف بڑوں بلکہ خاص طور پر بچوں کے لیے انتہائی جان لیوا ہیں۔