پوتن کے لیے ٹرمپ کے سرخ قالین نے مغربی میڈیا کو حواس باختہ کر دیا

پوتن کے لیے ٹرمپ کے سرخ قالین نے مغربی میڈیا کو حواس باختہ کر دیا

 روسی وزارتِ خارجہ کی ترجمان ماریا زاخارووا نے کہا ہے کہ امریکی صدر ڈونلڈ ٹرمپ کی جانب سے اپنے روسی ہم منصب ولادیمیر پوتن کے لیے الاسکا ایئرپورٹ پر سرخ قالین بچھا کر استقبال نے مغربی میڈیا کو حواس باختہ کر دیا ہے۔

زاخارووا نے ہفتہ کو اپنے ٹیلیگرام پیغام میں لکھا مغربی میڈیا ایسی کیفیت میں ہے جسے دیوانگی کہا جا سکتا ہے؛ تقریباً مکمل جنون۔ انہوں نے مزید کہا کہ پچھلے تین برس سے مغربی ذرائع ابلاغ مسلسل روس کی تنہائی کی تصویر کشی کر رہے تھے، مگر اب دنیا نے دیکھا کہ روسی صدر کا امریکہ کی سرزمین پر کس عزت و احترام سے استقبال ہوا۔

جمعہ کے روز امریکی ریاست الاسکا کے شہر اینکریج میں واقع المندورف-ریچرڈسن فوجی اڈے پر صدر ٹرمپ اور صدر پوتن کی تاریخی ملاقات ہوئی۔ دونوں رہنماؤں نے ایئرپورٹ پر باضابطہ استقبال کے بعد سرخ قالین پر ایک دوسرے سے مصافحہ کیا اور امریکی جنگی طیاروں کی موجودگی میں یادگاری تصاویر بھی بنوائیں۔

یہ ملاقات ایسے وقت میں ہوئی ہے جب صدر ٹرمپ یوکرین جنگ کے جلد خاتمے کا وعدہ کر رہے ہیں، جبکہ پوتن خطے میں اپنے مضبوط اثرورسوخ کے ساتھ مذاکرات کی میز پر بیٹھے ہیں۔ تجزیہ کاروں کے مطابق یہ مکالمہ روس۔امریکہ تعلقات میں ایک نئے موڑ کا آغاز بھی ہو سکتا ہے اور یوکرین تنازعے کے مستقبل پر گہرے اثرات ڈال سکتا ہے۔