پاکستانی صدر کا عراق کے ساتھ دفاعی تعلقات اور زیارتوں کی سہولت پر زور

سچ خبریں:  صدر پاکستان آصف علی زرداری نے عراق کے صدر اور وزیر اعظم سے الگ الگ ملاقاتوں کے دوران دونطرفہ دفاعی تعلقات میں مسلسل پیش رفت، بشمول تربیتی پروگرامز اور عراق کو پاکستان کی دفاعی مصنوعات کی فراہمی پر اطمینان کا اظہار کیا۔

انہوں نے عراق کی ضروریات اور سلامتی کے تقاضوں کے مطابق دفاعی تعاون کو مزید تقویت دینے کے پاکستان کے عزم پر زور دیا۔

صدر زرداری نے عراق کے اپنے دورے کو خطے میں ثقافتی رابطوں اور ہم آہنگی کو بڑھانے کے سفر کا حصہ قرار دیا۔

انہوں نے عوام سے عوام کے تعلقات کو وسعت دینے، خاص طور پر پاکستان سے عراق تک زیارتی سفر کو آسان بنانے کی اہمیت پر بھی روشنی ڈالی۔

صدر پاکستان نے اپنے سرکاری دورہ عراق کے دوران نجف اشرف میں مقدس حرم امیرالمومنین حضرت امام علی علیہ السلام کی زیارت کی۔

آصف علی زرداری اور ان کے وفد نے کربلائے معلی میں واقع مقدس مقامات کا دورہ بھی کیا۔

اس کے بعد صدر مملکت نے کوفہ مسجد اور حضرت امام علی علیہ السلام سے منسوب مکان کی زیارت کی۔

حرم حضرت امام علی علیہ السلام، حضرت امام حسین علیہ السلام اور حضرت عباس علیہ السلام پر انہوں نے اسلامی امت کے امن، وحدت اور یکجہتی کے لیے دعا کی۔

صدر پاکستان نے کوفہ مسجد میں بھی حاضری دی جہاں انہوں نے مسجد کے مختلف حصوں کا دورہ کیا اور زائرین سے بیٹھ کر پرخلوص بات چیت کی۔

آصف علی زرداری نے گذشتہ روز عراقی صدر اور وزیر اعظم سے ملاقاتوں کے بعد کاظمین شہر کا رخ کیا۔

صدر پاکستان نے امامین کاظمین علیہما السلام کی زیارت کی اور آستانہ مقدسہ امام موسی کاظم علیہ السلام اور امام محمد تقی علیہ السلام کے حرمین میں حاضری دی۔