وزارتِ عظمیٰ کے لیے 6 امیدوار زیرِ غور:عراقی ذرائع ابلاغ

 وزارتِ عظمیٰ کے لیے 6 امیدوار زیرِ غور:عراقی ذرائع ابلاغ

عراق کے دارالحکومت بغداد میں سیاسی مشاورت کا سلسلہ تیز ہونے کے ساتھ ہی ایک سابق رکنِ پارلیمان نے انکشاف کیا ہے کہ ملک میں وزارتِ عظمیٰ کے امیدواروں کی تعداد کم ہو کر صرف 6 رہ گئی ہے، جبکہ پارلیمان کے پہلے نائب اسپیکر کے عہدے کے لیے دو بڑی شیعہ جماعتوں کے درمیان سخت مقابلہ متوقع ہے۔

 المعلومہ سے گفتگو کرتے ہوئے سابق رکنِ پارلیمان معین الکاظمی نے بتایا کہ وزارتِ عظمیٰ کے لیے اب صرف 6 نام زیرِ غور ہیں۔ ان میں تین وہ شخصیات شامل ہیں جو اس سے قبل وزیرِ اعظم کے عہدے پر فائز رہ چکی ہیں، جبکہ تین دیگر نئے چہرے ہیں۔

الکاظمی کے مطابق شیعہ جماعتوں پر مشتمل کوآرڈینیشن فریم ورک کے اجلاس تاحال جاری ہیں تاکہ وزارتِ عظمیٰ کے لیے حتمی امیدوار کا انتخاب کیا جا سکے۔ انہوں نے مزید کہا کہ پارلیمان کے پہلے نائب اسپیکر کے منصب کے لیے بدر تنظیم اور عصائب اہلِ حق کے درمیان براہِ راست مقابلہ ہوگا۔

انہوں نے وضاحت کی کہ امکان ہے کوآرڈینیشن فریم ورک، پارلیمان کے پہلے اجلاس سے قبل نائب اسپیکر کے عہدے کے لیے اپنا امیدوار نامزد کر دے۔ یہ پہلا اجلاس 29 تاریخ (8 دی) کو متوقع ہے۔

الکاظمی کا کہنا تھا کہ اگر دولتِ قانون اتحاد وزارتِ عظمیٰ کے لیے اپنے امیدوار پر اصرار کرتا ہے تو پھر نائب اسپیکر کے عہدے کے لیے کوئی متفقہ امیدوار سامنے نہیں آئے گا۔ تاہم پارلیمان کے اسپیکر کے انتخاب کے بعد، کوآرڈینیشن فریم ورک آئینی طور پر وزیرِ اعظم کے لیے اپنا امیدوار پیش کرنے کا پابند ہوگا۔

واضح رہے کہ عراق کے اعلیٰ آزاد انتخابی کمیشن نے حال ہی میں چھٹے پارلیمانی انتخابات کے حتمی نتائج کا اعلان کیا تھا، جن کے مطابق محمد شیاع السودانی کی قیادت میں تعمیر و ترقی اتحاد نے سب سے زیادہ نشستیں حاصل کیں۔

انتخابی نتائج کے بعد شیعہ جماعتوں پر مشتمل کوآرڈینیشن فریم ورک نے بغداد میں اجلاس کے بعد خود کو نئی پارلیمان میں سب سے بڑا پارلیمانی بلاک قرار دیا تھا۔