ٹرمپ کی قیادت کی خصوصیت دوطرفہ تعلقات کی بحالی ہے

روسی صدر ولادیمیر پوتین نے اپنے امریکی ہم منصب ڈونلڈ ٹرمپ کی قیادت کو سراہتے ہوئے کہا ہے کہ ٹرمپ کے برسرِاقتدار آنے کے بعد روس۔امریکہ تعلقات میں بہتری کی امید پیدا ہوئی ہے اور ان کی قیادت کی خصوصیات دوطرفہ روابط کی بحالی کے لیے مضبوط بنیاد فراہم کرتی ہیں۔

ترک خبر ایجنسی اناطولو کے مطابق پوتین نے جمعہ کے روز روس کے جوہری شعبے کے نمائندوں سے ملاقات میں کہا کہ 15 اگست کو ٹرمپ کے ساتھ ان کی ملاقات ’صاف گو اور بامعنی تھی جس نے تعلقات کی بحالی کا آغاز کیا۔

انہوں نے کہا کہ وہ پرامید ہیں کہ اب تک اٹھائے گئے ابتدائی اقدامات روس اور امریکہ کے درمیان جامع بحالی کی طرف پہلا قدم ہیں، تاہم یہ عمل صرف روس پر منحصر نہیں بلکہ زیادہ تر مغربی شراکت داروں پر بھی انحصار کرتا ہے، کیونکہ امریکہ مختلف اتحادوں خصوصاً نیٹو میں خاص وعدوں کا پابند ہے۔

یاد رہے کہ الاسکا ملاقات کے دو دن بعد وائٹ ہاؤس میں ایک اہم اجلاس ہوا جس میں یوکرین جنگ کے خاتمے پر تبادلہ خیال کیا گیا۔ یہ اجلاس 18 اگست 2025 کو صدر ٹرمپ کی میزبانی میں منعقد ہوا جسے مبصرین نے تاریخی قرار دیا۔

اس موقع پر یورپی کمیشن کی صدر اورسولا فان در لائن، برطانوی وزیراعظم کیئر اسٹارمر، یوکرینی صدر ولودیمیر زلنسکی، فرانسیسی صدر ایمانویل میکرون، اطالوی وزیراعظم جارجیا میلونی، جرمن چانسلر فریڈرش مرتس، فن لینڈ کے صدر الکساندر اسٹب اور نیٹو کے سیکرٹری جنرل مارک روٹے شریک تھے۔ اجلاس میں یوکرین کے لیے سیکیورٹی ضمانتوں اور آئندہ ممکنہ سہ فریقی ملاقات (ٹرمپ، پوتین اور زلنسکی) پر بات کی گئی۔