غزہ میں قحط کی باضابطہ تصدیق کے بعد امریکہ کو اسرائیل حمایت ختم کرنی چاہیے

غزہ میں قحط کی باضابطہ تصدیق کے بعد امریکہ کو اسرائیل حمایت ختم کرنی چاہیے

امریکی مسلم تنظیم کونسل آن امریکن اسلامک ریلیشنز (CAIR) نے کہا ہے کہ شمالی غزہ میں قحط کی باضابطہ تصدیق اس بات کا واضح اشارہ ہے کہ صدر ڈونلڈ ٹرمپ اور کانگریس کو اسرائیل کے لیے امریکہ کی غیر مشروط حمایت ختم کرنی چاہیے۔

الجزیرہ کے مطابق سی اے آئی آر نے سوشل میڈیا پلیٹ فارم ایکس پر لکھا کہ یہ قحط کسی قدرتی آفت کا نتیجہ نہیں بلکہ اسرائیل کے وحشیانہ محاصرے، خوراکی ڈھانچے کی دانستہ تباہی اور انسانی امداد کی منظم روک تھام کا براہِ راست نتیجہ ہے۔ ادارے نے اس صورتحال کو ’’اسرائیل کی بنائی ہوئی اور امریکہ کی حمایت یافتہ قحط‘‘ قرار دیا۔

یاد رہے کہ اکتوبر 2023 میں اسرائیل کے غزہ پر حملے کے آغاز سے اب تک واشنگٹن اربوں ڈالر کی فوجی امداد فراہم کرچکا ہے اور اقوام متحدہ سمیت عالمی اداروں میں اسرائیل کو احتساب سے بچاتا رہا ہے۔

اس دوران اقوام متحدہ کے زیرِ نگرانی کام کرنے والا ادارہ آئی پی سی (IPC)، جو دنیا بھر میں غذائی سلامتی کی نگرانی کرتا ہے، نے اعلان کیا ہے کہ غزہ شہر جہاں تقریباً پانچ لاکھ افراد رہتے ہیں قحط میں داخل ہو چکا ہے۔ ادارے نے خبردار کیا ہے کہ آنے والے چند ہفتوں میں یہی صورتحال دیر البلح اور خان یونس تک پھیل سکتی ہے۔

اقوام متحدہ کے ذیلی اداروں ایف اے او، ڈبلیو ایف پی، یونیسف اور ڈبلیو ایچ او نے بھی ایک مشترکہ بیان میں کہا کہ قحط پہلے ہی انسانی جانیں لے رہا ہے اور بچوں کو شدید خطرے میں ڈال رہا ہے۔ ان اداروں نے فوری جنگ بندی اور بڑے پیمانے پر انسانی امداد تک بلا رکاوٹ رسائی کا مطالبہ کیا ہے۔