ٹرمپ کو گمراہ کیا گیا،میری نامزدگی سے عراق پر پابندیاں نہیں لگیں گی:نوری المالکی

 ٹرمپ کو گمراہ کیا گیا، میری نامزدگی سے عراق پر پابندیاں نہیں لگیں گی

 عراق کے سابق وزیرِاعظم اور اتحادِ دولتِ قانون کے سربراہ نوری المالکی نے کہا ہے کہ امریکی صدر ڈونلڈ ٹرمپ کو ان کی نامزدگی کے حوالے سے گمراہ کیا گیا ہے اور ان کا وزیرِاعظم بننا عراق کو امریکی پابندیوں کی زد میں نہیں لائے گا۔

عراقی میڈیا کے مطابق نوری المالکی نے ایک ٹی وی انٹرویو میں انکشاف کیا کہ ٹرمپ کو تین ممالک اور عراق کے اندر بعض سیاسی حلقوں نے ان کی ممکنہ نامزدگی کے بارے میں غلط معلومات فراہم کیں۔ ان کا کہنا تھا کہ ان کی امیدواری ایک خالصتاً عراقی سیاسی عمل کا نتیجہ ہے، جو “کوآرڈینیشن فریم ورک” کی جانب سے سامنے آئی ہے، اس لیے وہ کسی غیر ملکی دباؤ پر دستبردار نہیں ہوں گے۔

المالکی نے واضح کیا کہ یہ دعویٰ بے بنیاد ہے کہ ان کی واپسی سے عراق پر اقتصادی پابندیاں عائد کی جائیں گی۔ ان کے بقول، اس قسم کی باتیں انہیں دستبردار کرانے کے لیے پھیلائی جا رہی ہیں۔

تاہم انہوں نے یہ بھی کہا کہ اگر کوآرڈینیشن فریم ورک کے ارکان کی اکثریت ان سے دستبردار ہونے کا مطالبہ کرے تو وہ اس پر غور کے لیے تیار ہیں۔

سوریہ کے حوالے سے بات کرتے ہوئے نوری المالکی نے کہا کہ وہ شام کے عبوری صدر احمد الشرع کے ساتھ تعاون کے لیے آمادہ ہیں۔

یہ بیان ایسے وقت میں سامنے آیا ہے جب نوری المالکی نے حال ہی میں اعلان کیا تھا کہ وہ امریکہ کی مخالفت کے باوجود وزارتِ عظمیٰ کے لیے اپنی امیدواری پر قائم رہیں گے۔ ان کا کہنا تھا کہ وزیرِاعظم کا انتخاب عراق کا اندرونی معاملہ ہے اور اس کا فیصلہ آئین اور عوامی ارادے کے مطابق ہونا چاہیے۔

واضح رہے کہ چند روز قبل امریکی صدر ڈونلڈ ٹرمپ نے نوری المالکی کی دوبارہ بطور وزیرِاعظم واپسی کی مخالفت کا اظہار کیا تھا، جبکہ عراقی کوآرڈینیشن فریم ورک نے اسے غیر ملکی مداخلت قرار دیتے ہوئے مسترد کر دیا ہے۔