نیٹو اور یورپی یونین کے خلاف پراگ میں دسیوں ہزار افراد کا مظاہرہ

?️ 4 ستمبر 2022

سچ خبریں:   چیک ریپبلک کے ہزاروں لوگ ہفتہ کے روز سڑکوں پر نکل کر ملک کی حکومت یورپی یونین اور نیٹو کے خلاف احتجاج کر رہے تھے۔

خبر رساں ادارے روئٹرز کے مطابق ہفتے کے روز جمہوریہ چیک کے دارالحکومت پراگ میں تقریباً 70 ہزار افراد نے حکومت کے خلاف مظاہرہ کیا اور حکمران اتحاد سے توانائی کی قیمتوں میں اضافے پر قابو پانے کے لیے مزید اقدامات کرنے کا مطالبہ کیا۔ مظاہرین نے یورپی یونین اور نیٹو کی مخالفت کا بھی اعلان کیا۔

اس مظاہرے کا اہتمام انتہائی دائیں بازو کے گروپ اور کمیونسٹ پارٹی سمیت دیگر سیاسی گروپوں نے کیا تھا اور پولیس نے بھی اس تقریب کی نگرانی کی تھی۔ گروپوں نے ایک بیان میں کہا ہے کہ جمہوریہ چیک کو فوجی طور پر غیر جانبدار رہنا چاہیے اور روس سمیت گیس فراہم کرنے والوں کے ساتھ براہ راست معاہدے کو یقینی بنانا چاہیے۔

اس مظاہرے کے منتظمین میں سے جیری ہاویل نے کہا کہ مظاہرے کا مقصد تبدیلی کا مطالبہ کرنا اور توانائی کی قیمتوں بالخصوص بجلی اور گیس کے مسئلے کو حل کرنا ہے جو اس موسم خزاں میں ہماری معیشت کو تباہ کر دے گا۔
یہ مظاہرہ دارالحکومت کے مرکزی چوکوں میں سے ایک میں حکومت کے عدم اعتماد کے ووٹ سے بچنے کے ایک دن بعد ہوا۔ چیک ریپبلک کے مغرب نواز وزیر اعظم پیٹر فیالا جو سینٹر رائٹ فائیو پارٹی اتحاد کے سربراہ ہیں نے کہا کہ مظاہرے کا اہتمام روس نواز فورسز نے کیا تھا۔