نیتن یاہو کے بیان کی عراق نےشدید مذمت کی

?️ 15 اگست 2025

نیتن یاہو کے بیان کی عراق نےشدید مذمت کی

عراق نے اسرائیلی وزیرِاعظم بنیامین نیتن یاہو کے اسرائیلِ کبیر کے تصور سے متعلق حالیہ بیان کی شدید مذمت کی ہے اور عالمی برادری سے مطالبہ کیا ہے کہ وہ مقبوضہ فلسطین پر جاری جارحیت کو روکنے اور اسرائیل کی سزا سے بچنے کی پالیسی کا خاتمہ یقینی بنائے۔

عراقی خبر رساں ایجنسی واع کے مطابق، جمعرات کو جاری بیان میں وزارتِ خارجہ عراق نے کہا کہ بغداد، صہیونی حکومت کے ان بیانات کو سختی سے مسترد کرتا ہے جو ’اسرائیلِ کبیر کے منصوبے اور خطے میں عدم استحکام پیدا کرنے کی نیت کی عکاسی کرتے ہیں۔

بیان میں واضح کیا گیا کہ یہ دعوے ملکوں کی خودمختاری، بین الاقوامی قوانین اور اقوامِ متحدہ کے چارٹر کی کھلی خلاف ورزی ہیں اور ان کے خلاف واضح اور مضبوط عرب و عالمی موقف اپنانا ضروری ہے۔

عراقی وزارتِ خارجہ کے مطابق، یہ بیانات ایسے وقت میں سامنے آئے ہیں جب اسرائیل اپنی جارحانہ پالیسیوں کو جاری رکھتے ہوئے فلسطینی عوام کے خلاف جرائم کا ارتکاب کر رہا ہے، جو اس کے توسیع پسندانہ عزائم اور اراضی ہتھیانے کی کوششوں کا حصہ ہیں۔وزارت نے زور دیا کہ اسرائیل کی جارحیت کو روکنے اور اسے جواب دہ بنانے کے لیے مؤثر اقدامات کیے جائیں۔

واضح رہے کہ بنیامین نیتن یاہو نے حال ہی میں اسرائیلی چینل I24 سے گفتگو میں کہا تھا: "میں ایک تاریخی اور روحانی مشن پر ہوں اور جذباتی طور پر اسرائیلِ کبیر کے خواب سے جڑا ہوا ہوں۔ ان کے اس بیان پر متعدد ممالک اور عرب سوشل میڈیا صارفین نے سخت ردِعمل ظاہر کیا ہے۔