غزہ کو مکمل تباہ کرنے کا منصوبہ ایک سال سے زیادہ وقت لے گا:اسرائیلی اخبار

 غزہ کو مکمل تباہ کرنے کا منصوبہ ایک سال سے زیادہ وقت لے گا:اسرائیلی اخبار

اسرائیلی اخبار ہآرتص نے فوجی ذرائع کے حوالے سے انکشاف کیا ہے کہ کابینہ کی ہدایت کے مطابق غزہ شہر کو سطح زمین اور زیرِ زمین دونوں سطحوں پر مکمل طور پر نابود کرنے میں کم از کم کئی ماہ اور ممکنہ طور پر ایک سال سے زیادہ وقت لگ سکتا ہے۔

فوجی ذرائع کے مطابق، یہ منصوبہ چیف آف اسٹاف ایال زامیر نے کابینہ کو پیش کیا تھا جس میں تجویز دی گئی ہے کہ اگر حماس کے ساتھ کسی معاہدے پر پہنچا جائے تو جنگ روک دی جائے اور قیدیوں کی بازیابی کو ترجیح دی جائے۔ تاہم، اسرائیلی قیادت کے درمیان اختلافات شدت اختیار کر گئے ہیں کیونکہ خدشہ ہے کہ بڑے حملے کے آغاز سے صہیونی قیدیوں کی جانیں خطرے میں پڑ سکتی ہیں۔

اسی تناظر میں، اسرائیلی وزیر جنگ اسرائیل کاتس نے اعلان کیا ہے کہ فوج پوری طاقت سے حماس کو شکست دینے، تمام قیدیوں کو آزاد کرانے اور جنگ کو اسرائیلی شرائط پر ختم کرنے کی کوشش کرے گی۔

ذرائع کے مطابق، گزشتہ روز کابینہ کے اجلاس میں وزیر خزانہ بزالل اسموتریچ اور چیف آف اسٹاف ایال زامیر کے درمیان شدید لفظی جھڑپ بھی ہوئی۔ اسموتریچ نے الزام لگایا کہ زامیر جنگ ختم کرنے کے خواہاں ہیں، جس پر زامیر نے جواب دیا: "تم کچھ نہیں سمجھتے، تمہیں بٹالین اور بریگیڈ میں فرق معلوم نہیں۔”

رپورٹ کے مطابق، اسرائیل نے غزہ پر حملے کے لیے 60 ہزار ریزرو فوجیوں کو طلب کرنے کی منظوری بھی دے دی ہے۔ یہ فیصلہ اس وقت کیا گیا ہے جب محاصرے میں پھنسے ہوئے دو ملین سے زائد فلسطینیوں کے انسانی بحران میں تیزی سے اضافہ ہو رہا ہے۔