عرب ممالک کا یمن کا مسئلہ حل کرنے کے لیے سید حسن نصر اللہ سے رابطہ

?️ 16 فروری 2022

سچ خبریں:عرب ممالک نے سید حسن نصر اللہ کو پیغام بھیجا ہےکہ وہ سعودی اتحاد کو یمن کی دلدل میں مسلسل شکست سے بچانے کے لیے ثالثی کا کردار ادا کریں۔
لبنانی اخبار اللواء نے اپنے پیر کے شمارے میں خبر دی ہے کہ عرب ممالک میں سے ایک نے لبنانی حزب اللہ کے سکریٹری جنرل کو ایک پیغام میں باضابطہ اور براہ راست ان سے یمن کے مسئلے میں داخل ہونے اور سعودی عرب اور متحدہ عرب امارات پر انصار اللہ کے ڈرون حملے بند کرانے میں مدد کرنے کا مطالبہ کیا ہے۔

اخبارنے حزب اللہ کے ایک اعلیٰ عہدے دار کے حوالے سے کہا ہےکہ ایک عرب ملک نے سید حسن نصر اللہ سے براہ راست کہا ہے کہ وہ عرب ممالک (سعودی عرب اور متحدہ عرب امارات) پر انصار اللہ کے حملوں کو روکنے کے لیے ثالثی کریں ، اس کے بدلہ میں سعودی اتحاد بھی یمن پر اپنے حملے معطل کر دے گا۔

ذرائع ابلاغ کے مطابق حزب اللہ اور اس کے سکریٹری جنرل کو یمنی بحران کے حل کے لیے ثالثی کی یہ پہلی باضابطہ اور براہ راست درخواست ہے اور یہ ایسے حالات میں پیش کی گئی جبکہ عرب میڈیا حزب اللہ کے خلاف بے مثال حملے کر رہا ہے۔

رپورٹ میں مزید کہا گیا ہے کہ یہ کوششیں سید حسن نصر اللہ کے ردعمل کے بعد ناکام ہوئیں کیونکہ حزب اللہ کے سکریٹری جنرل نے جواب میں کہا کہ حزب اللہ کے حوثیوں کے ساتھ تعلقات صرف اس گروپ کی حمایت اور کسی بھی قسم کے مذاکرات کے فریم ورک میں ہیں لہذا کوئی بھی بات براہ راست اس گروپ کے ساتھ کی جانا چاہیے، ہمارے ساتھ نہیں اور حزب اللہ کا یمن کے معاملے سے کوئی تعلق نہیں ہے۔