طالبان حکومت کو تسلیم کرلو؛طالبان وزیر اعظم کی اسلامی ممالک سے اپیل

?️ 20 جنوری 2022

سچ خبریں:طالبان کے وزیر اعظم ملاحسن اخوندزادہ نے ایک پریس کانفرانس میں پوری عالمی برادری خاص طور پر اسلامی ممالک سے اپیل کی ہے کہ وہ طالبان حکومت کو تسلیم کریں۔
افغانستان کے جمہور اخبار کی رپورٹ کے مطابق طالبان کے وزیراعظم ملا حسن آخوند زادہ نے پہلی بار ایک پریس کانفرنس میں تمام حکومتوں خاص طور پر اسلامی ممالک سے طالبان حکومت کو تسلیم کرنے کا مطابہ کیا ہے، اطلاعات کے مطابق طالبان کے افغانستان میں اقتدار سنبھالنے کے بعد مقرر کردہ نگراں وزیر اعظم ملا حسن آخوندزادہ نے یہ عہدہ سنبھالنے کے 4 ماہ بعد پہلی پریس کانفرنس کی۔

اس پریس کانفرنس میں طالبان کے عبوری وزیراعظم ملا حسن اخوند زادہ کے ہمراہ افغانستان میں اقوام متحدہ کے پروجیکٹس کے انتظامی امور کی نگرانی کرنے والے ارکان بھی موجود تھے،پریس کانفرس میں طالبان حکومت کے نگراں وزیر اعظم ملا حسن اخوندزادہ نے تمام ممالک اور بالخصوص اسلامی حکومت سے طالبان حکومت کو تسلیم کرنے کا مطالبہ کیا۔

طالبان کے عبوری وزیر اعظم نے کہا کہ عالمی برادری نے تسلیم کیا ہے کہ افغانستان کے سابق صدر اشرف غنی کرپٹ سیاستداں تھے اگر عالمی برادری سابق کرپٹ صدر کو تسلیم کرسکتی ہے تو طالبان کو بھی تسلیم کرنا چاہیے کیونکہ طالبان نے افغانستان سے فساد اور کرپشن کا خاتمہ کرنے کے سلسلے میں اہم اقدامات انجام دیے ہیں۔

ملا حسن آخوندزادہ نے اسلامی ممالک پر زوردیا کہ وہ طالبان کی حکومت کو باقاعدہ تسلیم کرنے کے سلسلے میں پہل کریں تاکہ افغانستان کے عوام کو درپیش مشکلات کو حل کیا جاسکے، طالبان وزير اعظم نے کہا کہ اسلامی ممالک کو مستقل بنیادوں پر فیصلہ کرنا چاہیے اور کسی دوسرے کے دباؤ میں نہیں آنا چاہیے۔