اسرائیل بدترین ریاستی دہشتگردی کا ذمہ دار ہے:پاکستان 

اسرائیل بدترین ریاستی دہشتگردی کا ذمہ دار ہے:پاکستان

 اقوام متحدہ میں پاکستان کے مستقل نمائندے عاصم افتخار احمد نے سلامتی کونسل کے اجلاس سے خطاب میں کہا ہے کہ اسرائیل ایک یاغی اور غیر ذمہ دار حکومت ہے جس کی پالیسیوں اور اقدامات نے مشرق وسطیٰ کو مسلسل عدم استحکام کا شکار بنایا ہوا ہے۔

انہوں نے واضح کیا کہ یہ پہلا موقع نہیں ہے کہ اسرائیل دوسروں پر الزام تراشی کرکے اپنی غیر قانونی کارروائیوں اور بین الاقوامی قوانین کی خلاف ورزیوں کو چھپانے کی کوشش کر رہا ہے۔

پاکستانی سفیر کے مطابق اسرائیل ایک قابض قوت ہونے کے ناطے نہ صرف امن کے ہر امکان کو ختم کر رہا ہے بلکہ بے بنیاد الزامات اور فریب کاری کے ذریعے اپنے غیر قانونی اقدامات کو قانونی جواز دینے کی کوشش بھی کرتا ہے۔

عاصم افتخار احمد نے کہا کہ غزہ اور مقبوضہ فلسطینی علاقوں میں اسرائیل کی کارروائیاں بدترین قسم کی ریاستی دہشتگردی ہیں، اور عالمی برادری اس پر خاموش نہیں رہ سکتی۔

انہوں نے مزید کہا کہ مشرق وسطیٰ میں بحران اور بدامنی کی بنیادی وجہ اسرائیل کا طویل عرصے سے عرب سرزمین پر قبضہ اور مسلسل عالمی قوانین کی خلاف ورزی ہے۔

یاد رہے کہ اس سے قبل پاکستانی وزارت خارجہ نے قطر میں اسرائیل کے حملے کی سخت مذمت کرتے ہوئے اسے قطر کی خودمختاری، اقوام متحدہ کے منشور اور بین الاقوامی قوانین کی کھلی خلاف ورزی قرار دیا تھا۔