شہید قاسم سلیمانی کے قتل کیس کے سلسلہ میں ایرانی اور عراقی عدلیہ کمیٹی کا مشترکہ بیان

?️ 23 دسمبر 2021

سچ خبریں:ایرانی عدلیہ کے بین الاقوامی امور کے نائب سربراہ نے اعلان کیاکہ اسلامی جمہوریہ ایران اور جمہوریہ عراق نے شہید قاسم سلیمانی، شہید ابو مہدی المہندس اور ان کے ساتھیوں کے خلاف مجرمانہ اور دہشت گردانہ کارروائیوں کی تحقیقات کے سلسلے میں تہران میں ایک مشترکہ بیان پر دستخط کیے ہیں۔
شہید سلیمانی کے قتل کیس کے سلسلہ میں تشکیل پانے والی اسلامی جمہوریہ ایران اور جمہوریہ عراق کی عدلیہ کمیٹی کے دوسرے مشترکہ اجلاس میں ایرانی عدلیہ کے بین الاقوامی امور کے نائب سربراہ کاظم غریب آبادی نے کہا کہ جنرل قاسم سلیمانی اور شہید ابو مہدی المہندس اور ان کے ساتھیوں کے خلاف مجرمانہ کارروائی کی تحقیقات سے متعلق 24 نومبر کو بغداد میں مشترکہ کمیٹی کا اجلاس منعقد ا جس کے بعد کمیٹی کا دوسرا اجلاس21 اور 22 دسمبر کو تہران میں منعقد ہوا۔

انہوں نے مزید کہاکہ اس بیان میں دونوں فریقوں نے اس بات پر زور دیا کہ بغداد کے بین الاقوامی ہوائی اڈے پر شہید قاسم سلیمانی، شہید ابو مہدی المہندس اور ان کے ساتھیوں کے خلاف مجرمانہ کارروائی، بین الاقوامی قوانین کی خلاف ورزی، بشمول دہشت گردی کے خلاف متعلقہ بین الاقوامی کنونشنز، اور بین الاقوامی ذمہ داری کا سبب بنتا ہے۔

ایرانی عدلیہ کے بین الاقوامی امور کے نائب سربراہ اور انسانی حقوق کے عملے کے سکریٹری نے کہاکہ دونوں ممالک نے اس مجرمانہ فعل میں ملوث تمام افراد، فیصلہ سازوں، منصوبہ سازوں اور مجرموں کی شناخت، مقدمہ چلانے، ان کے خلاف قانونی کارروائی کرنے اور سزا دینے کے لیے اپنے سنجیدہ اور پرعزم عزم کا اعادہ کیا۔