شام میں دہشت گرد گروہوں کی سرگرمیاں، عراق کی سلامتی کے لیے سنگین خطرہ

?️ 15 نومبر 2025

شام میں دہشت گرد گروہوں کی سرگرمیاں، عراق کی سلامتی کے لیے سنگین خطرہ

عراقی پارلیمنٹ کے رکن محمد البلداوی نے شام میں سرگرم دہشت گرد گروہوں کی بڑھتی ہوئی نقل و حرکت پر سخت تشویش کا اظہار کرتے ہوئے کہا ہے کہ یہ تحرکات براہِ راست عراق کی قومی سلامتی اور استحکام کے لیے خطرہ بن رہی ہیں۔

عراقی خبررساں ویب سائٹ المعلومه کے مطابق البلداوی کا کہنا ہے کہ شام کے اندر کئی دہشت گرد گروہ اب بھی سرگرم ہیں، اور ان کی موجودگی عراق کے سرحدی علاقوں کے لیے خاص طور پر خطرناک صورتِ حال پیدا کر رہی ہے۔

انہوں نے خبردار کیا کہ ایسے گروہ کسی بھی سیکورٹی کمزوری سے فائدہ اٹھا کر عراق میں گھس پُھنس یا کارروائیوں کی کوشش کر سکتے ہیں۔

البلداوی نے حکومت اور سکیورٹی اداروں سے اپیل کی کہ سرحدی نگرانی کو مزید سخت بنایا جائے اور دہشت گردوں کی نقل و حرکت پر گہری نظر رکھی جائے، تاکہ ملک کو عدم استحکام کا شکار کرنے کی کسی بھی کوشش کو ناکام بنایا جا سکے۔

اس کیساتھ ہی شام کی صورتِ حال بھی مسلسل کشیدہ ہے۔ شام کی وزارتِ دفاع کے مطابق جمعہ کی شب دمشق کے مضافاتی علاقوں سے دو کاتیوشا راکٹ داغے گئے جو المَزّہ اور اس کے اطراف کے رہائشی محلوں پر گرے۔

شام کی عبوری وزارتِ دفاع کا کہنا ہے کہ وزارتِ داخلہ کے ساتھ مل کر راکٹ فائر کرنے کے مقام اور ذمہ داران کی نشاندہی کے لیے مشترکہ تحقیقات جاری ہیں۔ بیان میں مزید کہا گیا کہ شہریوں کی جان و مال سے کھیلنے والے عناصر کو قانون کے کٹہرے میں لایا جائے گا اور دارالحکومت کی سلامتی کو خطرے میں ڈالنے والے ہر فرد یا گروہ کے خلاف سخت کارروائی کی جائے گی۔

شام میں مسلسل عدم استحکام اور سرحدی علاقوں میں تشدد کے واقعات نے عراق کے لیے سکیورٹی خدشات کو مزید بڑھا دیا ہے۔