شامی عوام کے ہاتھوں امریکی فوجی قافلہ پسپائی پر مجبور

🗓️ 13 اپریل 2022

سچ خبریں:شامی ذرائع نے اطلاع دی ہے کہ الحسکہ کے نواح میں ایک گاؤں کے رہائشیوں نے امریکی فوجی قافلے کا راستہ روک دیا۔
شام کی سرکاری نیوز ایجنسی کی رپورٹ کے مطابق شام میں الحسکہ کے مضافات میں دیہاتیوں نے امریکی فوجی قافلے کا راستہ روک دیا اورانہیں واپس جانے پر مجبور کر دیا۔

رپورٹ کے مطابق الحسکہ کے نواح میں واقع قامشلی کے علاقے میں صالحیہ حرب نامی گاؤں کے مکینوں نے شامی فوج کے تعاون سے اس علاقے سے گزرنے کی کوشش کرنے والے امریکی قابض افواج کے ایک قافلے کو روکا۔

مقامی ذرائع کے مطابق قافلہ پانچ بکتر بند گاڑیوں اور ایک گاڑی پر مشتمل تھا جس کا تعلق قصد ملیشیا سے تھا،ذرائع نے مزید بتایا کہ دیہاتیوں نے قابضین کے قافلے کا تعاقب کرتے ہوئے پتھراؤ کرتے ہوئے قافلے کو پیچھے ہٹنے اور علاقہ چھوڑنے پر مجبور کیا۔

یاد رہے کہ شام میں ایسا پہلی بار نہیں ہوا ہے بلکہ اس سے پہلے بھی متعدد بار اس ملک کے شہریوں نے امریکی قابض فوج کے قافلوں روکا ہے اور انہیں اپنے علاقے سے گذرنے کی اجازت نہیں دی اس لیے کہ شامی عوام امریکیوں کو قابضین کی نظر سے دیکھتی ہے جو اس ملک کی حکومت کے بغیر یہاں آئے ہیں اور داعش کا مقابلہ کرنے کے بہانے شام کے قدرتی ذخائر کو لوٹنے کے ساتھ ساتھ دہشت گردوں کے لیے سہولت کاری کا کام کر رہے ہیں۔