سوریہ کے وسطی علاقے میں نامعلوم افراد کا حملہ، 9 افراد زخمی

سوریہ کے وسطی علاقے میں نامعلوم افراد کا حملہ، 9 افراد زخمی

سوریہ کے وسطی حصے میں واقع صوبہ حمص کے مغربی نواحی علاقے میں نامعلوم مسلح افراد کے حملے کے نتیجے میں نو افراد زخمی ہو گئے ہیں۔ شامی ذرائع ابلاغ کے مطابق یہ واقعہ ایک دیہی علاقے میں پیش آیا جہاں ایک کھیل کے ہال کو نشانہ بنایا گیا۔

شامی عبوری حکومت کے ایک سکیورٹی اہلکار نے سرکاری خبر رساں ایجنسی سانا کو بتایا کہ مغربی حمص کے نواحی گاؤں عین الخصرا میں ایک گیم ہال پر نامعلوم مسلح افراد نے حملہ کیا جس کے باعث وہاں موجود افراد زخمی ہو گئے۔ زخمیوں کو فوری طور پر قریبی طبی مراکز منتقل کیا گیا جبکہ حملہ آور موقع سے فرار ہونے میں کامیاب ہو گئے۔ تاحال کسی فرد یا گروہ نے اس حملے کی ذمہ داری قبول نہیں کی ہے۔

دوسری جانب امریکی فوج کی مرکزی کمانڈ سینٹکام نے اعلان کیا ہے کہ اس نے حالیہ دنوں میں شام میں داعش کے خلاف پانچ فضائی حملے کیے ہیں۔ سینٹکام کے بیان کے مطابق 27 جنوری سے 2 فروری کے دوران داعش کے مختلف ٹھکانوں کو نشانہ بنایا گیا اور ایک مواصلاتی مرکز، حساس لاجسٹک تنصیبات اور اسلحہ ذخیرہ کرنے کے مراکز کو تباہ کیا گیا۔

سینٹکام کے کمانڈر بریڈ کوپر نے کہا کہ یہ کارروائیاں شام میں داعش کے دوبارہ ابھرنے کو روکنے کے لیے جاری امریکی کوششوں کا حصہ ہیں۔

یاد رہے کہ دسمبر میں شام میں ایک داعشی حملہ آور کی فائرنگ سے امریکی فوج کے دو اہلکار اور ایک امریکی شہری ہلاک جبکہ اتحادی افواج کے تین اہلکار زخمی ہو گئے تھے جس کے بعد امریکہ نے داعش کے خلاف مزید کارروائیاں شروع کر دی تھیں۔