سعودی لڑاکا طیاروں کی مأرب پر شدید بمباری

🗓️ 3 اپریل 2021

سچ خبریں:یمن کے صوبہ مأرب کے جنوبی محور پر سعودی اتحادی لڑاکا طیاروں کے وحشیانہ حملے میں دو شہری شہید اور سات دیگر شدید زخمی ہوگئے۔
المسیرہ نیوز چینل کی رپورٹ کے مطابق سعودی اتحاد یمن کے مختلف علاقوں میں اپنے وحشیانہ فوجی حملے جاری رکھے ہوئے ہے، اس بار سعودی لڑاکا طیاروں نے صوبہ مأرب کے جنوبی محور پر بمباری کی،رپورٹ کے مطابق صوبہ مأرب کے جنوب میں واقع رحبہ علاقے کو سعودی اتحادیوں کے جنگی طیاروں نے نشانہ بنایا ، حملوں میں دو یمنی شہری شہید اور سات دیگر شدید زخمی ہوئے۔

دریں اثنا ، المسیرہ چینل نے کل اعلان کیاکہ سعودی اتحاد سے وابستہ لڑاکا طیاروں نے یمن پر حملے کے آغاز سے اب تک 30000 سے زیادہ بار صوبہ مأرب کو نشانہ بنایا ہے،یادرہے کہ اس صوبہ میں سعودی اتحاد کے فضائی حملوں میں 796 شہری شہید یا زخمی ہوئے ہیں جن میں زیادہ تر خواتین اور بچے ہیں۔

باخبر ذرائع نے المسیرہ کو بتایا کہ سعودی اتحاد کے فضائی حملوں نے 54147 سے زیادہ خاندانوں کو بھی بے گھر کردیا جن میں سے 3773 سے زیادہ یمنی دارالحکومت صنعا منتقل ہوچکے ہیں،صوبہ مأرب کے صحت اور طبی انفراسٹرکچر کے شعبے میں سعودی اتحاد کے حملوں نے 3 اسپتالوں اور 4 طبی مراکز کو تباہ کردیا ہے جس کی وجہ سے اس صوبہ کی عوام کو شدید مشکلات کا سامنا ہے۔

اعدادوشمار کے مطابق 592 مکانات اور 183 فارم تباہ ہوچکے ہیں یا انھیں نقصان پہنچا ہے، یادرہے کہ سعودی اتحا دکے ہاتھوں مأرب کے تباہ شدہ اسکولوں کی تعداد 29 تک پہنچ گئی ہے جس کی وجہ سے ہزاروں بچے تعلیم سے محروم ہوگئے ہیں۔