سعودی فضائی حدود صیہونیوں کے لیے کھلی، یمنیوں کے لیے بند؛انصاراللہ

?️ 3 فروری 2022

سچ خبریں:یمن کی انصار اللہ تحریک کے سربراہ نے امریکیوں اور اسرائیلیوں کو مسلمانوں کے حقیقی دشمن قرار دیتے ہوئے کہا کہ وہ امت مسلمہ کے اندر موجود مسائل سے فائدہ اٹھا کر اپنے مقاصد حاصل کرنے کی کوشش کر رہے ہیں۔
المسیرہ چینل کی رپورٹ کے مطابق یمن کی انصار اللہ تحریک کے سربراہ سید عبدالملک الحوثی نے کل الجوف اور مأرب قبائل کے دو وفود سے ملاقات کے دوران یمن کے الجوف صوبے کے باشندوں کے درمیان سلامتی کو بہتر بنانے اور بھائی چارے کے جذبے کو مضبوط بنانے پر زور دیا اور امید ظاہر کی کہ الجوف میں مسائل کے حل کے لیے مقامی حکام اور قبائلی رہنماؤں کے درمیان استحکام اور تعاون کی فضا قائم ہوگی۔

رپورٹ کے مطابق سید عبدالملک الحوثی نے تاکید کی کہ یمنی قوم کے دشمن مختلف عنوانات کے تحت عوام کے درمیان تفرقہ اور اختلافات پیدا کرنے کی کوشش کر رہے ہیں، انہوں نے کہا کہ اسرائیل اور اس کے حامی یمنی عوام کو اپنا مشترکہ دشمن سمجھتے ہیں۔

انھوں نے مزید کہا کہ امریکی اور اسرائیلی مسلمانوں کے اصل دشمن ہیں اور وہ ہماری قوم کے اندر موجود مسائل سے اپنے مفاد اور اپنے مقاصد کے لیے فائدہ اٹھانے کی کوشش کر رہے ہیں، انصار اللہ رہنما نے اسرائیلی صدر اسحاق ہرزوگ کے تین روز قبل متحدہ عرب امارات کے دورے اور سعودی عرب کی فضائی حدود سے ان کے طیارے کی پرواز کا بھی حوالہ دیتے ہوئے کہا کہ سعودی عرب نے ہرزوگ پر اپنا آسمان کھول دیا جبکہ یمنی عوام کو اپنی فضائی حدود استعمال کرنے سے روک رکھا ہے۔