سعودی عرب اسرائیل کے ساتھ تعلقات معمول پر لانے کو مسترد کر رہا ہے

?️ 11 نومبر 2025

سعودی عرب اسرائیل کے ساتھ تعلقات معمول پر لانے کو مسترد کر رہا ہے

خبر رساں ادارے رویٹرز نے اپنی ایک رپورٹ میں کہا ہے کہ سعودی عرب امریکی صدر ڈونلڈ ٹرمپ کے دباؤ کے باوجود اب بھی اسرائیل کے ساتھ تعلقات معمول پر لانے کے عمل میں شامل ہونے کے لیے تیار نہیں۔

رپورٹ کے مطابق ٹرمپ نے حال ہی میں دعویٰ کیا تھا کہ سعودی عرب جلد اسرائیل کے ساتھ معمول کے تعلقات قائم کر سکتا ہے، تاہم امکان ہے کہ اس ماہ ولی عہد محمد بن سلمان کے دورۂ واشنگٹن کے دوران ایسا کوئی اعلان نہ کیا جائے۔ دہائیوں کی دشمنی کے بعد سعودی عرب اور اسرائیل کے درمیان سفارتی تعلقات کا قیام مشرقِ وسطیٰ کی سیاسی و سکیورٹی توازن کو بدل سکتا ہے اور خطے میں امریکی اثر و رسوخ کو مضبوط بنا سکتا ہے۔

ٹرمپ گزشتہ ماہ امید ظاہر کر چکے ہیں کہ سعودی عرب جلد امارات، بحرین اور مراکش کی طرح ابراہیم معاہدوں میں شامل ہو جائے گا، لیکن دو سعودی ذرائع نے رویٹرز کو بتایا ہے کہ ریاض نے واشنگٹن کو سفارتی ذرائع کے ذریعے آگاہ کر دیا ہے کہ اس کا مؤقف بدستور وہی ہے: سعودی عرب صرف اسی صورت اس عمل میں شامل ہوگا جب ایک آزاد فلسطینی ریاست کے قیام کے لیے واضح اور قابلِ عمل روڈمیپ طے پائے۔

ذرائع کے مطابق سعودی عرب چاہتا ہے کہ کسی بھی عوامی اعلان سے قبل واشنگٹن کے ساتھ مکمل ہم آہنگی برقرار رہے تاکہ کوئی غلط فہمی پیدا نہ ہو۔ سابق امریکی انٹیلی جنس اہلکار جوناتھن پانی‌کوف کے مطابق ولی عہد محمد بن سلمان اپنے آئندہ دورے میں ٹرمپ پر دباؤ ڈالیں گے کہ وہ ایک آزاد فلسطینی ریاست کے قیام کی کھل کر حمایت کریں۔

 سعودی ذرائع کا مزید کہنا ہے کہ ٹرمپ کے دباؤ کے باوجود جب تک فلسطینی ریاست کے قیام کے لیے حقیقی پیش رفت موجود نہ ہو اور اسرائیلی وزیراعظم نیتن یاہو کی سخت مخالفت جاری رہے، اس عمل میں آگے بڑھنا ممکن نہیں۔ رپورٹ کے مطابق بن سلمان اور ٹرمپ کی ملاقات کا مرکزی ایجنڈا دفاعی تعاون اور سرمایہ کاری ہوگا، اور توقع ہے کہ دونوں فریق ایک ایسا معاہدہ کریں گے جس کے تحت امریکہ سعودی عرب کے لیے ایک نیا دفاعی فریم ورک تشکیل دے گا اور خلیج فارس میں اپنی فوجی موجودگی کو مزید مضبوط کرے گا۔