خان یونس میں پناہ گزینوں کے خیموں پر اسرائیلی حکومت کا وحشیانہ حملہ

سچ خبریں: غزہ کی پٹی میں فلسطینی شہریوں کے خلاف صیہونی حکومت کے تازہ ترین جرم میں شہر خانیونس کے مغرب میں بے گھر افراد کے خیموں کو فضائی حملوں کا نشانہ بنایا گیا۔

اس بمباری کے نتیجے میں، جس نے براہ راست بے گھر افراد کی رہائش کے خیموں کو نشانہ بنایا، متعدد فلسطینی شہری زخمی ہوئے۔

صیہونی حکومت کے خان یونس کے علاقے المواصی میں بے گھر افراد کی رہائش گاہ پر وحشیانہ حملے میں ایک 8 سالہ فلسطینی بچے امل یاسر عمر نے شہادت پائی۔

بعض رپورٹس کے مطابق اس وحشیانہ بمباری کے نتیجے میں 2 فلسطینیوں بشمول ایک بچے نے اپنی جانوں سے ہاتھ دھو کر شہادت پائی۔

طبی ذرائع نے ان حملوں میں مزید 14 غیر فوجی افراد کے زخمی ہونے اور زخمیوں کو طبی مراکز منتقل کرنے کی اطلاع دی ہے۔

گزشتہ روز، غزہ کی پٹی پر قابض صیہونی حکومت کی فوج کے حملوں کے تسلسل میں، ایک ڈرون نے غزہ شہر کے مرکز میں الیرموک اسٹیڈیم کے سامنے بے گھر افراد کی رہائش کے خیمے کو براہ راست نشانہ بنایا۔

طبی ذرائع کے اعلان کے مطابق، اس حملے میں 10 سے زائد فلسطینی بشمول متعدد خواتین اور بچے زخمی ہوئے اور دو زخمیوں کی حالت تشویشناک بتائی گئی ہے۔ یہ خیمہ الوفاء کیمپ کے قریب اور الوحدہ اسٹریٹ کے علاقے میں واقع تھا۔