جنگ بندی کا معاہدہ عوام کی قربانیوں اور مزاحمت کا نتیجہ ہے:فلسطینی مزاحمتی گروہ

 جنگ بندی کا معاہدہ عوام کی قربانیوں اور مزاحمت کا نتیجہ ہے:فلسطینی مزاحمتی گروہ

 فلسطینی مزاحمتی تنظیموں نے جمعرات کے روز جاری اپنے علیحدہ بیانات میں کہا ہے کہ غزہ میں ہونے والا جنگ بندی اور قیدیوں کے تبادلے کا معاہدہ کسی بیرونی طاقت کا احسان نہیں، بلکہ یہ فلسطینی عوام کی استقامت، قربانی اور مزاحمت کا نتیجہ ہے۔

جبهۂ خلق برائے آزادی فلسطین نے اپنے بیان میں کہا کہ جنگ بندی کا معاہدہ فلسطینی عوام کی ثابت قدمی اور دشمن پر دباؤ کا نتیجہ ہے۔یہ معاہدہ اسرائیلی جنگی مشین کے ٹوٹنے اور فلسطینیوں کی پائیداری کا ثبوت ہے۔ یہ نسل کشی کے خاتمے کی طرف پہلا قدم ہے۔

اسلامی جہاد فلسطین نے بھی اپنے بیان میں واضح کیا کہ یہ کامیابی کسی کی نعمت یا بخشش نہیں، بلکہ فلسطینی عوام اور مجاہدین کی قربانیوں کا نتیجہ ہے۔

بیان میں کہا گیا اگر فلسطینی عوام مزاحمت نہ کرتے تو دشمن کے ساتھ مذاکرات کی میز تک پہنچنا یا اس پر اپنی شرائط منوانا ممکن نہ ہوتا۔

تنظیم نے شہداء کو خراج عقیدت پیش کرتے ہوئے کہا کہ انہی کی قربانیوں کی بدولت آج دشمن کو جنگ روکنے پر مجبور کیا گیا ہے۔

کمیٹیوں برائے مزاحمت فلسطین نے کہا کہ یہ معاہدہ مصر، قطر اور ترکی کی ثالثی سے طے پایا، لیکن اس کی اصل بنیاد غزہ کے عوام کی دو سالہ مزاحمت ہے۔

بیان میں کہا گیا ہماری یکجہتی اور تسلیم سے انکار نے اسرائیلی منصوبوں کو ناکام بنا دیا۔ دشمن چاہتا تھا کہ فلسطینیوں کو بے دخل کر دے، مگر وہ ناکام رہا۔ عوام اب بھی اپنی سرزمین پر ثابت قدم ہیں۔

کمیٹیوں نے عرب، اسلامی اور بین الاقوامی برادری سے مطالبہ کیا کہ وہ اسرائیل اور امریکہ پر دباؤ برقرار رکھیں تاکہ معاہدے پر مکمل عمل درآمد یقینی بنایا جا سکے اور صہیونی فوج کی مکمل واپسی ممکن ہو۔

ان بیانات سے قبل، حماس نے باضابطہ طور پر جنگ بندی اور قیدیوں کے تبادلے کا معاہدہ طے پانے کا اعلان کیا۔حماس کے مطابق، یہ معاہدہ شرم الشیخ میں امریکی صدر کے پیش کردہ امن منصوبے پر مبنی مذاکرات کے بعد طے پایا، جس میں جنگ کا خاتمہ، اسرائیلی افواج کا انخلا، انسانی امداد کی فراہمی اور اسیران کا تبادلہ شامل ہے۔