تجارتی تعاون، سفارتی تعلقات اور علاقائی استحکام ایرانی صدر کے دورہ پاکستان میں اہم ترجیحات

 تجارتی تعاون، سفارتی تعلقات اور علاقائی استحکام ایرانی صدر کے دورہ پاکستان میں اہم ترجیحات

صدرِ ایران ڈاکٹر مسعود پزشکیان کا حالیہ دورۂ پاکستان، دونوں ممالک کے درمیان برادرانہ تعلقات کو مزید مضبوط بنانے، تجارتی روابط کو فروغ دینے اور خطے میں امن و استحکام کو تقویت دینے کے اہم اہداف پر مبنی ہے۔ اس دورے کو پاکستانی میڈیا میں نمایاں کوریج حاصل ہوئی ہے۔

پاکستان کے معروف نیوز چینل ARY نیوز نے ایرانی سفیر رضا امیری مقدم کے ساتھ انٹرویو نشر کیا، جس میں انہوں نے صدر ایران کے اس دورے کے مقاصد پر روشنی ڈالی۔

ایرانی سفیر نے واضح کیا کہ ڈاکٹر مسعود پزشکیان کا دورہ پاکستان دونوں ممالک کے درمیان دوستانہ اور برادرانہ رشتوں کو مزید گہرا کرنے کے لیے نہایت اہم ہے۔

انہوں نے مزید کہا کہ ایران کی حالیہ ۱۲ روزہ جنگ میں ملت ایران نے دشمن کے خلاف جانفشانی سے دفاع کیا، اور اس نازک وقت میں پاکستانی عوام اور حکومت نے ایرانی قوم کے ساتھ بھرپور یکجہتی اور حمایت کا مظاہرہ کیا۔

سفیر کے مطابق، صدر پزشکیان کا یہ دورہ پاکستانی حکومت اور عوام کی اس یکجہتی پر شکریہ ادا کرنے کا بھی موقع ہے، کیونکہ پاکستان نے عالمی و علاقائی سطح پر ایران کے مؤقف کی حمایت کی ہے، خاص طور پر اسلامی دنیا سے متعلق حساس معاملات میں۔

انہوں نے یہ بھی بتایا کہ صدر ایران کا پہلا پڑاؤ لاہور ہوگا، جو برصغیر کا ثقافتی مرکز اور پاکستان کی تاریخ کا اہم شہر ہے۔ صدر لاہور میں شاعر مشرق علامہ محمد اقبالؒ کے مزار پر حاضری دیں گے اور بادشاہی مسجد سمیت دیگر تاریخی مقامات کا دورہ کریں گے۔

یہ دورہ نہ صرف ایران و پاکستان کے تعلقات کو ایک نئی بلندی دے گا بلکہ دونوں ممالک کے درمیان اقتصادی اور سفارتی شراکت کو مزید وسعت دینے کی بنیاد بھی بنے گا۔