برطانیہ کا یوکرین کو مزید اسلحہ فراہم کرنے کا اعلان

?️ 4 مئی 2022

سچ خبریں:برطانوی وزیراعظم بورس جانسن نے اعلان کیا ہے کہ وہ یوکرین کو مزید تیس کروڑ پونڈ کا اسلحہ فراہم کر رہے ہیں۔
روسی خبر رساں ایجنسی کی رپورٹ کے مطابق برطانوی وزیر اعظم بورس جانسن نے یوکرین کی پارلیمنٹ سے ویڈیو کانفرنس کے ذریعے خطاب کرتے ہوئے کہا ہے کہ برطانیہ یوکرین کو تیس کروڑ پونڈ کے فوجی ہتھیار فراہم کررہا ہے تاکہ جنگ میں اس ملک کی فوجی مدد کی جا سکے۔

یاد رہے کہ اس سے قبل برطانوی وزیر جنگ نے بھی ایک اشتعال انگیز بیان میں کہا تھا کہ جنگ جاری رہنے کی صورت میں مغرب، یوکرین کو ٹینکوں اور جنگی طیاروں سمیت مختلف قسم کے جنگی ہتھیار فراہم کر سکتا ہے۔

برطانوی وزیر خارجہ نے بھی مغرب کی جانب سے یوکرین کی زیادہ سے زیادہ فوجی مدد کئے جانے کی ضرورت پر زور دیتے ہوئے کہا تھا کہ یوکرین کی جنگ، پانچ سال یا اس سے بھی زیادہ عرصے تک جاری رہ سکتی ہے۔

واضح رہے برطانیہ کی جانب سے یہ اعلان ایسے وقت میں کیا گیا ہے جبکہ روس نے امریکہ سمیت تمام ملکوں کو خبردار کیا ہے کہ یوکرین کے لئے فوجی مدد کی فراہمی جنگی حالات مزید بدتر ہونے اور خطرناک نتائج برآمد ہونے کا باعث بنے گی۔