ایران اور روس کا امریکہ کو واضح پیغام

ایران اور روس کا امریکہ کو واضح پیغام

امریکی جریدے نیوزویک نے اپنی تازہ رپورٹ میں انکشاف کیا ہے کہ ایران اور روس نے بحیرہ خزر میں تین روزہ مشترکہ بحری مشقوں کا آغاز کیا ہے، جسے واشنگٹن کو ایک واضح پیغام قرار دیا جا رہا ہے کہ تہران اور ماسکو کے درمیان دفاعی تعاون مضبوط ہو چکا ہے۔

رپورٹ کے مطابق یہ مشقیں ایسے وقت میں شروع کی گئی ہیں جب حالیہ ہفتوں میں اسرائیل نے ایران کے جوہری تنصیبات کو نشانہ بنایا اور ایران نے اس کے ردعمل میں اپنی دفاعی تیاریوں کو مزید مستحکم کرنے کی کوشش کی ہے۔

نیوزویک کے دفاعی تجزیہ کار کا کہنا ہے کہ:یہ بحری مشقیں نہ صرف عسکری ہم آہنگی کا مظاہرہ ہیں بلکہ امریکہ، اسرائیل اور مغربی اتحاد کو یہ پیغام بھی دیتی ہیں کہ ایران اب روس اور چین جیسے طاقتور اتحادیوں کے ساتھ دفاعی اشتراک کی راہ پر گامزن ہے۔

رپورٹ میں مزید کہا گیا ہے کہ ایران کے نائب وزیر خارجہ، عباس عراقچی نے حال ہی میں شنگھائی تعاون تنظیم (SCO) کے سیکیورٹی اجلاس میں شرکت کی۔ وہاں انہوں نے روسی اور چینی حکام سے ملاقات کے دوران امریکی عسکری جارحیت کی مخالفت میں متحد ہونے اور اسٹریٹجک تعاون کو وسعت دینے پر زور دیا۔

نیوزویک کے مطابق:ایران اور روس نے رواں سال کے اوائل میں ایک جامع دفاعی معاہدہ کیا تھا، جس کے تحت وہ مشترکہ مشقوں، ٹیکنالوجی کی شراکت، اور مشترکہ خطرات کے خلاف ہم آہنگی کو فروغ دیں گے۔

تجزیہ کاروں کے مطابق، یہ مشقیں نہ صرف ایران اور روس کی عسکری طاقت کا مظہر ہیں، بلکہ ایک نئے علاقائی اتحاد کے ابھار کی علامت بھی ہو سکتی ہیں، جو مغربی بالادستی کو چیلنج کرنے کے لیے تیار ہے۔