گورنر پنجاب نے اپنا چین کا سرکاری دورہ منسوخ کر دیا

?️ 22 جولائی 2025

لاہور (سچ خبریں) گورنر پنجاب سردار سلیم حیدر خان نے پنجاب میں شدید بارشی اور سیلابی صورتحال کے پیش نظر اپنا چین کا سرکاری دورہ منسوخ کر دیا۔

تفصیلات کے مطابق گورنر پنجاب سردار سلیم حیدر خان نے کہا کہ میں نے اپنی تمام تقریات اور مصروفیات شدید بارشوں اور سیلاب کی وجہ سے ختم کر دی ہیں۔ انہوں نے کہا کہ راولپنڈی میں سیلابی ریلے میں گاڑی میں بہہ جانے والے باپ اور بیٹی کی تلاش جاری ہے، تمام ریسکیو ٹیمیں سیلاب کی شدید صورتحال کے باعث بہہ جانے والے باپ بیٹی کی تلاش میں مصروف ہیں۔

ذرائع کے مطابق گورنر پنجاب نے کہا کہ موجودہ سیلابی صورتحال میں تمام سیاسی جماعتوں کو سیاست سے بالا تر ہو کر متاثرین کے ساتھ کھڑے ہونا چاہئے۔ سردار سلیم حیدر خان نے کہا کہ قدرتی آفات کا مقابلہ نہیں کیا جا سکتا مگر اس سے بچاؤ کے لئے موثر اقدامات کئے جا رہے ہیں۔

گورنر پنجاب نے عوام سے اپیل ہے کہ لینڈ سلائیڈنگ اور ایسے پہاڑی علاقوں میں جانے سے گریز کریں جہاں جان کا خطرہ ہو۔ انہوں نے کہا کہ پیپلز پارٹی سیلاب سے ہونے والی تباہ کاریوں میں عوام کو اکیلے نہیں چھوڑے گی، بحیثیت گورنر پنجاب خود سیلابی علاقوں میں جاکر نقصانات کا جائزہ لے رہا ہوں۔