ہم ملکی خدمت میں ناکام ہو جائیں تو نتائج کے ذمہ دار ہوں گے، وزیراعظم شہباز شریف

?️ 12 جولائی 2025

اسلام آباد: (سچ خبریں) وزیراعظم شہباز شریف نے کہا ہے کہ میں کارکردگی نہ دکھانے والوں کو نہیں جانتا، کارکردگی کی بنیاد پر جانچ کا پیمانہ ہی نئی تبدیلی ہے، اگر ہم ملکی خدمت میں ناکام ہوجائیں تو نتائج کے ذمہ دار ہونگے، عوامی خدمت سے ہی ہم اپنا سر فخر سے بلند کرسکتے ہیں۔

ڈان نیوز کے مطابق وزیراعظم شہباز شریف کی ’اڑان پاکستان‘ سمر اسکالرز کے لیے منتخب طلبہ سے گفتگو کرتے ہوئے کہا کہ اس پروگرام میں ملک کے ہر کونے سے نوجوانوں کی نمائندگی شامل ہے، نوجوان سپر اسٹارز کی کہکشاں سے بہت متاثر ہوا ہوں۔

انہوں نے ایک سوال کے جواب میں کہا کہ ہم نے چیلنجز پر قابو پانے کا کٹھن سفر طے کیا ہے، عوام کی خدمت ہماری ذمہ داری ہے اس سے پیچھے نہیں ہٹیں گے، ٹیم ورک، عوامی خدمت اور کارکردگی پر یقین رکھتا ہوں، عوامی خدمت کے لیے کارکردگی کا مظاہرہ کرنے والے ہمارا فخر ہیں۔

وزیراعظم پاکستان نے مزید کہا کہ ہم نے مشکل حالات میں حکومت سنبھالی، 2023 میں اکثریت کا خیال تھا کہ ملک خدانخواستہ دیوالیہ ہو جائے گا تاہم مجھے یقین تھا کہ ملک ڈیفالٹ نہیں کرےگا۔

شہباز شریف نے مزید کہا کہ آئی ایم ایف سے معاملات طے پانے پر ہم ڈیفالٹ سے بچ گئے، ہم نے ذمہ داری اٹھائی اور متحد ہوکر آگے بڑھنےکاعزم کیا، اللہ تعالیٰ کے فضل سے پُرخلوص اور سنجیدہ کوششوں سے ٹیم ورک کے ساتھ مثبت نتائج سامنے آئے۔

وزیراعظم شہباز شریف نے کہا کہ ملک سے کرپشن اور سفارش کلچر ختم کر کے میرٹ اور شفافیت کو فروغ دیا ہے، ایف بی آر میں ڈیجیٹلائزیشن نے حقیقت کا روپ دھار لیا، انفورسمنٹ سے صرف ایک شعبے میں محاصل 12 سے بڑھ کر 50 ارب روپے ہو گئے۔

شہباز شریف کا مزید کہنا تھا کہ حکومت کے مؤثر اقدامات سے اقتصادی شعبے کے اشاریے بہتر ہوئے، پالیسی ریٹ کم ہوکر 11فیصد کرنے سے لوگ بینکوں سے پیسہ نکال کر سرمایہ کاری کریں گے۔

وزیراعظم شہباز شریف نے مزید کہا کہ ماہرین کی مشاورت سے اُڑان پاکستان پروگرام کو حتمی شکل دینے میں کئی ماہ لگے، اُڑان پاکستان ملکی ترقی اور آگے بڑھنے کا منصوبہ ہے، شرکا کو مختلف شعبوں، وزارتوں اور محکموں میں سیکھنےکاموقع ملےگا۔