امریکی ریاست کولاراڈو کے جنگلات میں ہولناک آتشزدگی؛600 سے زائد مکانات نذرآتش

?️ 2 جنوری 2022

سچ خبریں:امریکی ریاست کولاراڈو کے جنگلات میں لگنے والی آگ نے اب تک600 سے زائد رہائشی مکانات کو جلا کر رکھ کر دیا ہے۔
ایسوسی ایٹڈ پریس کی رپورٹ کے مطابق امریکی ریاست کولاراڈو کے جنگلات میں لگنے والی آگ شدت اختیار کرگئی جس نے سیکڑوں گھروں کو جلا کر راکھ کردیا ہے،اطلاعات کے مطابق کولاراڈو کے جنگلات میں منگل کی رات اچانک لگنے والی آگ نے دیکھتے ہی دیکھتے بہت بڑے علاقے کو اپنی لپیٹ میں لے لیا جس کے بعد مقامی انتظامیہ نے فوری طورپر ہنگامی اقدامات کرتے ہوئے رہائشیوں کو گھروں سے نکال کر محفوظ مقام کی طرف منتقل کیا۔

یادرہے کہ اس دوران ریسکیو اداروں کے رضا کار، محکمہ فائر بریگیڈ کا عملہ اور پولیس کی بھاری نفری وقوعہ پر پہنچی اور امدادی کام شروع کیے،مقامی حکام کے مطابق آتشزدگی کے باعث اب تک 600 گھر جل کر راکھ ہوچکے ہیں جبکہ تیز ہواؤں کی وجہ سے آگ پر قابو پانے میں مشکلات کا سامنا ہے اور یہ 1600 ایکڑ سے زائد رقبے پر پھیل چکی ہے جس پر ابھی تک قابو نہیں پایا جاسکا ہے۔

حکام نے بتایا کہ آگ لگنے کے نتیجے میں کسی جانی نقصان کی اطلاع سامنے نہیں آئی البتہ 6 شہری زخمی ہوئے جنہیں اسپتال منتقل کردیا گیا ہے۔