امریکہ اور ایران کے درمیان فوری معاہدے تک رسائی ضروری ہے: ماکرون

سچ خبریں: فرانس کے صدر ایمانوئل ماکرون نے آج اتوار کو سوشل میڈیا پلیٹ فارف ایکس پر اپنے ایک پیغام میں کہا کہ انہوں نے سعودی عرب کے ولی عہد محمد بن سلمان، سلطان عمان ہیثم بن طارق، متحدہ عرب امارات کے صدر محمد بن زاید اور مصر کے صدر عبدالفتاح السیسی سے مشاورت کی ہے۔

فرانسیسی صدر نے واشنگٹن کی جانب سے ماضی میں مختلف ممالک کے ساتھ ہونے والے متعدد معاہدوں میں بار بار کی جانے والی خلاف ورزیوں کا کوئی ذکر کیے بغیر مزید کہا کہ میں نے ان سب کو ایک ہی پیغام دیا: امریکہ اور ایران کے درمیان فوری معاہدے تک رسائی ضروری ہے۔ اس موقع سے ابھی فائدہ اٹھایا جانا چاہیے۔ ترجیح جنگ بندی اور آبنائے ہرمز کو فوری طور پر بلا کسی شرط کے اور بین الاقوامی قوانین کے مطابق دوبارہ کھولنا ہے۔ اس کے بعد دیگر معاملات، خاص طور پر جوہری پروگرام اور علاقائی استحکام پر ایک جامع اور مضبوط معاہدے تک پہنچنے کے لیے مذاکرات جاری رکھے جائیں۔

امریکہ اور صہیونی حکومت کی ایران کے خلاف جارحیت نے آبنائے ہرمز سے بحری جہازوں کی آمدورفت میں خلل ڈال دیا ہے۔ اس اسٹریٹجک آبی گزرگاہ میں رکاوٹ نے دنیا بھر میں ایندھن اور توانائی کی سپلائی چین کے ساتھ ساتھ پیٹرو کیمیکل مصنوعات اور کھادوں جیسی دیگر اشیاء کی فراہمی کو بھی متاثر کیا ہے۔

ایران نے اعلان کیا ہے کہ وہ پائیدار جنگ بندی اور جنگ کے خاتمے کی صورت میں، ضروری حفاظتی پروٹوکولز اور تقاضوں کی رعایت کرتے ہوئے آبنائے ہرمز میں بحری جہاز رانی کی حفاظت کو یقینی بنانے کے لیے تیار ہے۔