امارات کے یمنی مزدوروں کا سعودی عرب کے ایجنٹوں کے خلاف مظاہرہ

سچ خبریں:متحدہ عرب امارات سے وابستہ یمن کے جنوبی علیحدگی پسندوں نے جمعے کے روز عدن شہر میں اپنے دفاتر کی بندش کے خلاف احتجاجی مظاہرہ کیا۔

ان مظاہروں کے دوران عدن کی مرکزی شاہراہوں پر سکیورٹی فورسز کی بھاری نفری تعینات کردی گئی، خاص طور پر اس لیے کہ حضرموت، شبوہ، لحج، ابین اور ضالع کے رہائشیوں نے بھی ان مظاہروں میں شرکت کی۔

مظاہرین نے زور دے کر کہا کہ وہ جنوبی یمن کی عبوری کونسل کو نظرانداز کرنے کے مخالف ہیں اور سعودی حمایت یافتہ یمن کی خود ساختہ حکومت کونسل کے دفاتر بند کرنے کے نتائج کی ذمہ دار ہے۔ انہوں نے سعودی عرب پر الزام لگایا کہ اس نے ریاض میں جنوبی عبوری کونسل کے وفد کو حراست میں لے رکھا ہے اور مطالبہ کیا کہ اس وفد کو رہا کیا جائے۔ مظاہرین نے سعودی عرب کو مخاطب کرتے ہوئے کہا کہ جنوبی علیحدگی پسندوں کی رضامندی کے بغیر مذکورہ حکومتی کارروائیوں کا تسلسل کشیدگی کو بڑھاوا دے گا۔

واضح رہے کہ یمن کے جنوبی علاقوں میں متحدہ عرب امارات اور سعودی عرب سے وابستہ کرائے کے فوجیوں کے درمیان مسلح تصادم میں طویل عرصے سے شدت آئی ہوئی ہے، یہاں تک کہ ان علاقوں میں اماراتی کرائے کے فوجیوں کی پیش قدمی کے تسلسل کے باعث ریاض نے ابوظبی سے مطالبہ کیا کہ وہ یمن میں اپنی فوجی موجودگی ختم کرے۔