اقوام متحدہ کا افغانستان اور پاکستان سے تحمل سے کام لینے کا مطالبہ

?️ 27 فروری 2026

سچ خبریں:

اقوام متحدہ کے سیکرٹری جنرل انتونیو گوتریش نے افغانستان اور پاکستان کے درمیان بڑھتی ہوئی سرحدی کشیدگی پر شدید تشویش کا اظہار کرتے ہوئے دونوں فریقین سے تحمل کا مظاہرہ کرنے اور سفارتی ذرائع سے مسائل حل کرنے پر زور دیا ہے۔

اقوام متحدہ کے ترجمان اسٹیفن دوجارک نے جمعرات کو ایک پریس بریفنگ میں بتایا کہ سیکرٹری جنرل افغانستان اور پاکستان کی سرحدی صورتحال پر گہری نظر رکھے ہوئے ہیں۔ انہوں نے کہا کہ سیکرٹری جنرل دونوں فریقین، افغانستان اور پاکستان، پر زور دیتے ہیں کہ وہ کسی بھی ایسی کارروائی سے گریز کریں جس سے کشیدگی میں اضافہ ہو۔

ترجمان کے مطابق گوتریش نے اسلام آباد اور کابل دونوں پر زور دیا ہے کہ وہ اپنے تمام اختلافات کو حل کرنے کے لیے سفارتی کوششیں جاری رکھیں۔ انہوں نے مزید کہا کہ سیکرٹری جنرل افغانستان اور پاکستان سے بین الاقوامی قوانین کے تحت اپنی ذمہ داریوں کی مکمل پاسداری اور متاثرہ علاقوں میں شہریوں کی جان و مال کے تحفظ کو یقینی بنانے کا مطالبہ کرتے ہیں۔

یہ بیان ایسے وقت میں سامنے آیا ہے جہاں دونوں ممالک کے درمیان سفارتی کشیدگی عسکری جھڑپوں میں تبدیل ہو گئی ہے۔ پاکستان کے وزیر دفاع خواجہ محمد آصف نے سماجی رابطے کی ویب سائٹ ایکس پر اپنے پیغام میں کہا کہ ہمارا صبر ختم ہو چکا ہے اور اب ہم کھلی جنگ میں داخل ہو گئے ہیں۔

پاکستان کے وزیر اطلاعات عطاء اللہ تارڑ کا کہنا تھا کہ پاکستانی فوج نے افغان طالبان کے ٹھکانوں کو نشانہ بنایا ہے۔ ان کے مطابق، پاکستانی کارروائی میں افغانستان کے صوبوں پکتیا اور قندھار میں طالبان کے 27 ٹھکانے تباہ اور 9 پر قبضہ کر لیا گیا۔ ان کا دعویٰ ہے کہ اس آپریشن میں 133 افغان جنگجو ہلاک اور 200 سے زائد زخمی ہوئے ہیں۔

دوسری طرف افغانستان کی وزارت دفاع نے دعویٰ کیا ہے کہ پاکستان کے خلاف جوابی کارروائی میں 55 پاکستانی فوجی ہلاک ہوئے ہیں۔ افغانستان کے نائب حکومتی ترجمان حمداللہ فطرت کے مطابق، افغان فورسز کی جوابی کارروائی میں درجنوں پاکستانی فوجی ہلاک، تقریباً 20 چوکیوں پر قبضہ اور دشمن کا کافی سامان ضبط کیا گیا ہے۔

واضح رہے کہ اس سے قبل افغانستان کے حکومتی ترجمان ذبیح اللہ مجاہد نے بھی ایک بیان میں کہا تھا کہ پاکستانی اشتعال انگیزی کے جواب میں ڈیورنڈ لائن کے ساتھ پاکستانی فوجی مراکز اور تنصیبات کے خلاف وسیع پیمانے پر آپریشن شروع کر دیا گیا ہے۔

کلیدی الفاظ: