افریقی یونین کی جامب سے اسرائیل کے صومالی لینڈ پر اقدام کی شدید مذمت

سچ خبریں:افریقی یونین سے وابستہ امن و سلامتی کونسل نے اپنے اجلاس کی حتمی قرارداد میں اسرائیل کی جانب سے نام نہاد "صومالی لینڈ” علاقے کو تسلیم کیے جانے کے اقدام کی شدید الفاظ میں مذمت کی ہے۔

افریقی امن و سلامتی کونسل کی حتمی قرارداد میں کہا گیا ہے کہ ہم اسرائیل کے اس اقدام کی جس میں اس نے نام نہاد جمہوریہ صومالی لینڈ کو تسلیم کیا ہے، شدید مذمت اور تردید کرتے ہیں، اور تل ابیب سے مطالبہ کرتے ہیں کہ وہ اس اقدام سے باز آجائے۔

کونسل نے مزید اپنے رکن ممالک اور دیگر شراکت داروں سے بھی مطالبہ کیا کہ وہ صومالیہ کی علاقائی سالمیت پر ایک بار پھر زور دیں۔

صیہونی حکومت نے کچھ عرصہ قبل غیر قانونی طور پر صومالی لینڈ کے علیحدگی پسندوں کو تسلیم کر لیا تھا، جس پر عالمی برادری میں شدید منفی ردعمل دیکھنے میں آیا۔

اسرائیلی اقدام پر ردعمل دیتے ہوئے صومالیہ کے وزیر مملکت برائے امور خارجہ نے حال ہی میں واضح کیا کہ صومالی لینڈ کو تسلیم کرنا پورے افریقی براعظم پر گہرے منفی اثرات مرتب کرے گا، اور ہم ایسے اقدام کو ہرگز قبول نہیں کریں گے، اور ہم اپنی خودمختاری کا تحفظ کریں گے۔

افریقی امن و سلامتی کونسل کی قرارداد کے ایک اور حصے میں سوڈان کی صورتحال کا ذکر کرتے ہوئے تاکید کی گئی کہ ہم سوڈان کے اتحاد اور علاقائی سالمیت کے تحفظ کے پابند ہیں، اور ہم ایسے متوازی اقدامات کے مخالف ہیں جو سوڈان کی حکومت کے اختیار کو کمزور کریں۔ ہم سوڈان میں فوری جنگ بندی کی ضرورت پر زور دیتے ہیں اور اس ملک میں کسی بھی قسم کی خارجی مداخلت کو مسترد کرتے ہیں۔