اسلام آباد کی ایران سے یکجہتی، بیرونی مداخلت اور جنگ کی مخالفت کا اعلان

پاکستان نے ایران کے داخلی امور میں کسی بھی قسم کی غیر ملکی مداخلت کی سخت مخالفت کرتے ہوئے کہا ہے کہ جنگ اور کشیدگی پورے خطے کے امن، سلامتی اور معاشی ترقی کے لیے نقصان دہ ہیں۔

پاکستان کی وزارتِ خارجہ کے ترجمان طاہر حسین اندرابی نے جمعرات کو اسلام آباد میں ہونے والی ہفتہ وار پریس بریفنگ کے دوران کہا کہ پاکستان ایران کے ساتھ سفارت کاری کے تسلسل کا حامی ہے اور تمام تنازعات کے پرامن حل پر یقین رکھتا ہے۔

امریکی فوجی سرگرمیوں اور ایران کے خلاف دھمکیوں سے متعلق ایک سوال کے جواب میں ترجمان نے کہا کہ اسلام آباد خطے میں ہونے والی پیش رفت پر گہری نظر رکھے ہوئے ہے اور گزشتہ ہفتے کے دوران ایران اور پاکستان کے وزرائے خارجہ کے درمیان دو بار ٹیلیفونک رابطہ ہوا ہے۔

انہوں نے واضح کیا کہ پاکستان ہمیشہ امن اور سفارت کاری کا حامی رہا ہے اور بالخصوص ایران سے متعلق کسی بھی قسم کی جنگ، تشدد یا عدم استحکام کی سخت مخالفت کرتا ہے۔

ترجمان نے زور دیا کہ پاکستان ایران کے داخلی معاملات میں بیرونی مداخلت اور اس کے خلاف عائد پابندیوں کا مخالف ہے اور سمجھتا ہے کہ جنگ یا بدامنی خطے کی مجموعی سلامتی، خوشحالی اور اقتصادی ترقی کو شدید نقصان پہنچا سکتی ہے۔

انہوں نے مزید کہا کہ پاکستان سفارتی کوششوں کے ساتھ ساتھ بین الاقوامی سطح پر بھی رابطے میں ہے اور حال ہی میں داووس میں امریکی حکام سے ملاقاتوں کے دوران اس بات پر زور دیا گیا کہ تمام مسائل کا حل پرامن ذرائع سے تلاش کیا جانا چاہیے۔

طاہر حسین اندرابی نے یاد دلایا کہ پاکستان نے ماضی میں بھی ایران پر سے پابندیاں اٹھانے کی حمایت کی ہے، جیسا کہ اقوام متحدہ کی سلامتی کونسل کی قرارداد اور جوہری معاہدے (برجام) کے تناظر میں، جبکہ جنیوا میں انسانی حقوق کونسل میں ایران مخالف قرارداد کی بھی مخالفت کی تھی۔

انہوں نے کہا کہ ایران پاکستان کا برادر اور اہم ہمسایہ ملک ہے اور عالمی سطح پر ایک مؤثر کردار ادا کرتا ہے، اسی لیے اسلام آباد کسی بھی صورت میں طاقت کے استعمال یا جنگ کی حمایت نہیں کرتا۔