اسرائیل کے خلاف کھیلوں کے بائیکاٹ کے بڑھتے رجحان پر صیہونی میڈیا کا انتباہ

?️ 8 دسمبر 2025

اسرائیل کے خلاف کھیلوں کے بائیکاٹ کے بڑھتے رجحان پر صیہونی میڈیا کا انتباہ

 صیہونی حکومت کے ذرائع ابلاغ نے اسرائیلی کھلاڑیوں کے خلاف جاری کھیلوں کے بائیکاٹ کے بڑھتے ہوئے رجحان پر تشویش کا اظہار کیا ہے۔ اس تشویش کی تازہ وجہ کویتی فینسر سلطان حسن کا وہ فیصلہ ہے جس کے تحت انہوں نے کینیڈا کے شہر وینکوور میں ہونے والی عالمی چیمپئن شپ میں اسرائیلی کھلاڑی ڈوف ویلنسکی کے خلاف مقابلے سے انصراف کرلیا۔

صیہونی اخبار اسرائیل ہیوم کے مطابق یہ واقعہ اس وقت پیش آیا جب گروپ مرحلے میں کویتی اور اسرائیلی کھلاڑی کے درمیان مقابلہ ہونا تھا، تاہم کویتی کھلاڑی نے حصہ لینے سے انکار کر دیا۔

اخبار نے لکھا کہ یہ واقعہ ایک الگ تھلگ مثال نہیں بلکہ اس سے پہلے انڈر 14 بین الاقوامی ٹینس مقابلوں میں بھی ایک اور کویتی کھلاڑی نے اسرائیلی حریف سے کھیلنے سے انکار کیا تھا، جسے کویت میں عوامی اور سیاسی سطح پر بھرپور حمایت اور پذیرائی حاصل ہوئی تھی۔

رپورٹ کے مطابق ان واقعات نے اسرائیل کو بین الاقوامی میدان میں ایک نئے چیلنج سے دوچار کر دیا ہے اور دنیا بھر میں اسرائیلی کھلاڑیوں کے خلاف کھیلوں کے بائیکاٹ کی لہر بدستور پھیل رہی ہے۔

ایرنا کے مطابق اس سے قبل دنیا بھر کے 48 نمایاں فٹبال کھلاڑیوں نے یورپی فٹبال فیڈریشن (یوفا) کو ایک مشترکہ بیان دیتے ہوئے مطالبہ کیا تھا کہ اسرائیلی کلبوں اور ٹیموں کو بین الاقوامی مقابلوں میں شرکت سے روک دیا جائے۔

بیان میں کہا گیا تھا کہ کھیل ظلم کے مقابلے میں غیر جانبدار نہیں رہ سکتا، اور خاموشی کا مطلب یہ مان لینا ہے کہ بعض انسانوں کی جان دوسروں سے زیادہ قیمتی ہے۔ دستخط کنندگان نے انصاف، مساوات اور دوہرے معیار کے بغیر عالمی اصولوں پر عمل کی ضرورت پر زور دیا۔

بیان میں یہ بھی کہا گیا کہ اسرائیل نے عالمی انسانی قوانین کی خلاف ورزی کی ہے اور وہ احترام، سلامتی اور اسپورٹس مین اسپرٹ کے اصولوں کے خلاف عمل کر رہا ہے۔

اس سے قبل برطانوی اخبار ٹائمز نے باخبر ذرائع کے حوالے سے رپورٹ دی تھی کہ یوفا کی ایگزیکٹو کمیٹی کے اکثر ارکان نے اسرائیل کی رکنیت معطل کرنے کی حمایت کی ہے۔

رپورٹ کے مطابق ایک بین الاقوامی تحقیقاتی کمیٹی کی رپورٹ کے بعد یہ موقف سامنے آیا، جس میں غزہ میں ہونے والے واقعات کو انتہائی سنگین انسانی بحران قرار دیا گیا۔

اسی دوران اقوام متحدہ کے ماہرین کے ایک گروپ نے بھی فیفا اور یوفا سے مطالبہ کیا ہے کہ اسرائیلی ٹیموں کی بین الاقوامی مقابلوں میں شرکت کو معطل کیا جائے۔