سچ خبریں:ایک ریٹائرڈ اسرائیلی جنرل نے اعتراف کیا کہ اگر ہم ایک ساتھ کئی محاذوں پر لڑنے کے لیے تیار نہ ہوئے تو اسرائیل کی موجودیت خطرے میں پڑ جائے گی۔
صیہونی حکومت کی ریزرو فورسز کے سابق کمانڈر جنرل اسحاق برک نے معاریو میگزین میں شائع ہونے والے ایک کالم میں اعتراف کیا ہے کہ اگر اسرائیل کے پاس متعدد محاذوں پر لڑائی کے لیے ضروری تیاری نہ ہوئی تو اس کے پاس اپنی موجودیت کو باقی رکھنے کا امکان نہیں رہے گا۔
اسرائیلی فوج کے اس ریٹائرڈ جنرل نے صیہونی حکومت کے جنرل اسٹاف کے سربراہ کے لیے نئے امیدوار ہرٹسی ہولوے کو اپنی سفارشات میں موجودہ حالات کے برعکس اسرائیلی فوج کی شان و شوکت اور طاقت کی بحالی پر زور دیتے ہوئے کہا کہ آنے والے برسوں میں ہمیں کئی محاذوں پر جنگ کا سامنا کرنے کے لیے ابھی سے تیاری کی ضرورت ہے۔
انھوں نے مزید اعتراف کیا کہ اسرائیلی فوج کے چیف آف اسٹاف کے لیے نئے امیدوار کو فوج کے موجودہ چیف آف اسٹاف کوخاوی سے ایک مشکل اور پیچیدہ میراث ملے گی، اس حوالے سے برک نے لکھا کہ فوج کے نئے چیف آف اسٹاف کا مشن مشکل ہے کیونکہ فوجی دستوں کی اندرونی صورت حال مشکل ہے اور مستقبل کی کسی بھی جنگ میں اسرائیل کو بڑی نسلی تباہی کے راستے پر لے جا سکتی ہے۔
