اسرائیل نے ٹرمپ کے امن منصوبے کو قبولیت سے پہلے ہی سبوتاژ کر دیا

اسرائیل نے ٹرمپ کے امن منصوبے کو قبولیت سے پہلے ہی سبوتاژ کر دیا

امریکی صدر ڈونلڈ ٹرمپ کے پیش کردہ امن منصوبے پر کئی ابہامات موجود ہیں، جن میں سب سے اہم مسئلہ اسرائیل کی جانب سے وعدوں پر عمل درآمد کی کوئی ضمانت نہ ہونا ہے۔ ماضی میں بھی اسرائیل کے رویے کو دیکھتے ہوئے یہ خدشہ ظاہر کیا جا رہا ہے کہ تل ابیب منصوبے کو سبوتاژ کر سکتا ہے۔

اسرائیلی چینل 7 کے مطابق، اسرائیلی فوج کے کمانڈروں نے غزہ میں تعینات اہلکاروں کے ساتھ ملاقات کے دوران کہا ہے کہ بستیوں کو غزہ کی سرحد کے باہر سے محفوظ رکھنا ممکن نہیں، اس کے لیے فوج کو غزہ کے اندر موجود رہنا ہوگا۔

اسرائیلی عسکری تجزیہ کار یوسی یحو شوع، جو منگل کے روز غزہ ڈویژن کے کمانڈروں کے ہمراہ موجود تھے، نے اپنی رپورٹ میں لکھا کہ فوجی قیادت کسی بھی ممکنہ منصوبے کے تحت غزہ سے انخلا کی سخت مخالفت کر رہی ہے۔ ان کے مطابق، منصوبے کے سکیورٹی پہلو اب بھی غیر واضح ہیں، مگر یہ بات بالکل عیاں ہے کہ جنوبی محاذ اور غزہ ڈویژن کے کمانڈروں کو پیچھے ہٹنے پر شدید تحفظات ہیں۔

یوسی یحو شوع کا کہنا ہے کہ مڈل کمانڈ سطح پر کئی افسران جنگ کے طویل ہونے سے تھکن کا شکار دکھائی دیتے ہیں۔ تاہم، انہوں نے یہ بھی واضح کیا کہ اگر سیاسی قیادت غزہ سے انخلا کا فیصلہ کرے تو فوج اس حکم پر عمل کرے گی اور جس مقام پر بھی تعینات کی جائے، وہاں سے اپنا دفاع کرنے کی صلاحیت رکھتی ہے۔