اسرائیلی میڈیا کی جانب سے عراق کے خلاف نئی پروپیگنڈا مہم

اسرائیلی میڈیا کی جانب سے عراق کے خلاف نئی پروپیگنڈا مہم

 اسرائیلی ذرائع ابلاغ نے حالیہ دنوں میں عراق کے خلاف نئی منفی مہم شروع کر دی ہے اور دعویٰ کیا ہے کہ اسرائیل کو عراق کی جانب سے ممکنہ خطرات کا سامنا ہے، جو ڈرون، میزائل حملوں یا زمینی کارروائیوں کی صورت میں ظاہر ہو سکتے ہیں۔

عراقی میڈیا صوت العراق کے مطابق، اسرائیلی خفیہ ادارہ موساد اور فوج نے مبینہ طور پر عراق سے آنے والے خطرات سے نمٹنے کی تیاری شروع کر دی ہے۔ اسرائیلی ویب سائٹ واللا نے رپورٹ کیا ہے کہ اسرائیلی فوج کے شمالی محاذ کی کمان نے اس حوالے سے ممکنہ خطرے پر انتباہ جاری کیا ہے۔

واللا نے دعویٰ کیا کہ عراق سے ہونے والے ممکنہ حملے اسی طرز کے ہو سکتے ہیں جیسے گزشتہ سال جنگ آئرن سوورڈ کے دوران اسرائیلی علاقوں پر کیے گئے میزائل اور ڈرون حملے تھے۔ رپورٹ میں یہ بھی کہا گیا کہ ایک متبادل امکان زمینی کارروائی کا ہے جو عراق سے شروع ہو کر شام کے راستے اردن کی سرحد تک پہنچ سکتی ہے۔

یہ دعوے ایسے وقت میں سامنے آئے ہیں جب امریکی وزیر دفاع پیت ہگست نے بھی علاقے میں ایک ممکنہ فوجی آپریشن کا عندیہ دیتے ہوئے عراق کو خبردار کیا کہ وہ اس کارروائی پر کوئی ردعمل ظاہر نہ کرے۔

عراقی وزیر دفاع ثابت العباسی نے اس حوالے سے بتایا کہ ان کی پیت ہگست سے ٹیلی فونک گفتگو ہوئی جس میں امریکی وزیر دفاع نے کہا کہ علاقے میں ایک بڑی فوجی کارروائی قریب ہے، اور ہم عراق کو آخری بار متنبہ کر رہے ہیں کہ ان کے مسلح گروہ اس میں کسی قسم کی مداخلت نہ کریں۔

سیاسی ماہرین کے مطابق، اسرائیلی میڈیا کی یہ فضاسازی دراصل علاقائی دباؤ بڑھانے اور عراق کے کردار کو کمزور دکھانے کی کوشش ہے، جبکہ واشنگٹن کی تازہ فوجی سرگرمیوں کے ساتھ اس کے واضح ہم آہنگی کے آثار نظر آ رہے ہیں۔