’میرا انٹرویو سیاق و سباق سے ہٹ کر پیش کیا گیا‘ حمزہ علی عباسی نے وضاحت جاری کردی

?️ 18 جون 2025

لاہور: (سچ خبریں) پاکستان تحریک انصاف کے حامیوں کی جانب سے تنقید کے بعد معروف اداکار حمزہ علی عباسی نے سابق وزیراعظم عمران خان اور پی ٹی آئی سے متعلق اپنے انٹرویو کے حوالے سے وضاحت جاری کردی۔

تفصیلات کے مطابق حمزہ عباسی نے حال ہی میں اینکر پرسن منصور علی خان کو ایک انٹرویو دیا جس پر انہیں شدید تنقید کا سامنا کرنا پڑا کیوں کہ سابق وزیراعظم عمران خان کے حامی سمجھے جانے والے اداکار نے پیٹرن انچیف پی ٹی آئی کے کئی اقدامات پر تنقید کی اور کہا تھا کہ عمران خان کے دور میں کچھ اچھی چیزیں تھیں اور کچھ بری چیزیں بھی ہوئیں، نو مئی غلط تھا، ملک میں لانگ مارچ بھی نہیں ہونے چاہئیں، تحریک انصاف کا 2014ء کا لانگ مارچ بھی نہیں ہونا چاہیئے تھا۔

ان کا کہنا تھا کہ سیاست میں حق اور باطل کے معرکے نہیں ہوتے یا صحیح اور غلط کی جنگ نہیں ہوتی، سیاست میں ایسا کچھ نہیں ہوتا، سیاست میں کسی بھی قسم کی محاذ آرائی نہیں ہونی چاہیئے، عمران خان کی مسلم لیگ ن کے خلاف مخالفت غلط تھی، چیزیں اس طرف نہیں جانی چاہئیں، یوٹیوب پر کچھ لوگ پیسوں کیلئے پاکستان تحریک انصاف اور عمران خان سے متعلق غیر حقیقی باتیں کررہے ہوتے ہیں۔

بتایا جارہا ہے کہ حمزہ علی عباسی کو اپنے اس بیان پر پی ٹی آئی حامیوں کی جانب سے شدید ردِ عمل کا سامنا کرنا پڑا جس کے باعث انہیں اس معاملے پر اب ایک بیان جاری کرکے وضاحت دینی پڑی، اس ضمن میں اداکار نے کہا ہے کہ کچھ سوشل میڈیا پلیٹ فارمز نے میرے انٹرویو کو سیاق و سباق سے ہٹ کر پیش کیا اور یہ تاثر دیا کہ میں نے عمران خان کے خلاف کوئی بیان دیا ہے جو سراسر غلط ہے، براہ مہربانی مکمل انٹرویو دیکھیں تاکہ آپ خود جان سکیں کہ میں نے اصل میں کیا کہا تھا۔