مشہور بالی ووڈ اداکارہ کی مسلمان سے شادی ؛اہلخانہ کا ردعمل

?️ 20 جون 2024

بالی ووڈ اداکارہ سوناکشی سنہا کی مسلمان لڑکے سے شادی پر خاندان کی ناراضگی کی خبروں پر ان کے والد شتروگھن سنہا کا ردعمل سامنے آگیا ہے۔

بالی ووڈ اداکارہ سوناکشی سنہا کے والد شتروگھن سنہا سے پوچھا گیا کہ کیا ان کا خاندان سوناکشی کے مسلمان لڑکے ظہیر اقبال سے شادی پر ناراض ہے اور شادی میں شرکت نہیں کرے گا تو انہوں نے اپنے مشہور ڈائیلاگ خاموش کے ذریعے جواب دیا۔

سینئر اداکار شتروگھن سنہا نے مزید کہا کہ سوناکشی کی شادی میں خاندان کی شرکت نہ کرنے اور ناراضگی کی تمام خبریں جھوٹی اور بے بنیاد ہیں۔

مزید پڑھیں: اسکول میں مذہبی معاملات کو نہیں لے جانا چاہئے: ہیما مالنی

انہوں نے کہا کہ سوناکشی کی زندگی ہے اور انہیں اپنے فیصلے کرنے کا پورا حق حاصل ہے، سوناکشی اور ظہیر کی جوڑی بہت خوبصورت لگتی ہے، سوناکشی میری اکلوتی بیٹی ہیں، ان سے ناراضگی کا سوال ہی پیدا نہیں ہوتا۔

شتروگھن سنہا نے کہا کہ سوناکشی مجھے اپنی طاقت سمجھتی ہیں تو یہ کیسے ممکن ہے کہ میں ان کا ساتھ نہ دوں، میں ممبئی میں سوناکشی کی شادی میں شریک ہونے آیا ہوں۔ اس بارے میں افواہیں پھیلانے والے اپنے کام سے کام رکھیں بات کو اچھالنے کی کوشش نہ کریں۔