عدنان ملک نے بھی عائزہ خان کے ڈرامے پر برہمی کا اظہار کیا

🗓️ 31 جولائی 2021

کراچی (سچ خبریں)پاکستان فلم و ٹی وی انڈسٹری کے معروف اداکار عدنان نے  بھی عائزہ خان کے نئے ڈرامے سیریل پر شدید برہمی کا اظہار کیاہے جس کے ایک سین میں خواتین کو بلیک میلنگ اور ہراساں کرنے کو حربے کے طور پر استعمال کرتے ہوئے دکھایا گیا تھا۔

عدنان ملک نے نجی ٹی وی چینل سے نشر ہونے والے ڈرامہ سیریل ’لاپتا‘ کے ایک سین میں خواتین کو بلیک میلنگ اور ہراساں کرنے کو حربے کے طور پر استعمال کرتے ہوئے دکھانے پر شدید غصے کا اظہار کیا ہے۔اس حوالے سے عدنان ملک نے فوٹو اینڈ ویڈیو شیئرنگ ایپ انسٹاگرام پر خصوصی اسٹوری شیئر کرتے ہوئے اپنے خیالات کا اظہار کیا۔

عدنان ملک نے اپنی انسٹاگرام اسٹوری میں لکھا کہ ’ڈرامے کا یہ سین دیکھ کر بہت زیادہ دُکھ ہوا ہے۔اداکار نے طنزیہ انداز میں لکھا کہ ’ویسے ہمیں حیران نہیں ہونا چاہیے کیونکہ ہمارے 99 فیصد ڈرامے گونگے، بہرے بنائے جاتے ہیں۔

اس سے قبل پاکستان پیپلز پارٹی کی رہنما اور رکن سندھ اسمبلی شرمیلا فاروقی اور گلوکارہ میشا شفیع نے بھی ڈرامہ سیریل ’لاپتا‘ کے اس سین کی وجہ سے شدید دُکھ کا اظہار کیا تھا۔خیال رہے کہ نجی ٹی وی سے نشر ہونے والے ڈرامہ سیریل ’لاپتا‘ کے ایک سین میں اداکارہ عائزہ خان کو گیتی کے کردار میں کچھ پیسے بچانے کے لیے دکاندار کو بلیک میل کرتے دکھایا گیا ہے۔